真係裝到 GL Tron遊戲 app玩㗎,不過本來隻錶啲電已經唔襟用,玩埋 game,更快收工。

Ads by Google

ILIKE
破解裝 app
上個禮拜借咗隻 Moto 360嚟試,正正經經用咗兩三日,最大用途真係用嚟語音覆 WhatsApp同 LINE同遙控影相,對應 Android Wear嘅 app,始終唔多。上網睇咗一輪,發現原來隻錶可以破解,即刻跟住步驟搞,最終真係成功直接裝 app入隻錶,可以用嚟打機。雖然屏幕好細,但用嚟玩簡單操作嘅 app,例如《 Flappy Bird》之類,其實真係夠玩。不過,又唔係任何 app都裝到,容量太大,或要上網攞數據嘅 app,一律裝咗都開唔到。如果想試,可以去「 corbindavenport.com/?p=167」研究吓。


周群雄

平玩 PureView
咁耐以嚟都冇買過一部 Windows Phone,皆因限制仲多過 iPhone, apps又少過人。不過,都好欣賞 Nokia出嘅 Lumia手機,每部都大玩 color機身,
而且又有 PureView影相技術,影暗景真係拍得住 iPhone 6,質素好出色。
欣賞還欣賞,要我俾五、六千蚊去試 Nokia嘅 PureView影相技術,就點都唔會考慮。
但最近推出嘅 Lumia 830($3,598),金屬邊框配上顏色底殼,拎上手感覺都唔錯。而且今次只需三千幾蚊就有 PureView,買嚟當後備手機都諗得過。

林勇

銀色金屬邊框配上橙色底殼,夠晒 sharp醒。

我認我膚淺
運動呢樣嘢雖然唔係我強項,跑步、行山、踩單車,一年都做唔到一次。唯獨籃球就耐唔中有打,而且睇 NBA亦多過睇歐聯。所以當知道 Beats by Dr. Dre Powerbeats 2 Wireless無線耳機($1,798)嘅靈感,係嚟自有大帝之稱嘅 NBA球星 LeBron James之後,已經好想買。藍牙連線距離有 9.15米,防水防汗設計,最啱一個人練波嗰陣聽歌,而且個耳夾都幾穩陣,跑跑跳跳都 fing唔郁耳機。最重要梗係盒面有 LeBron James個樣,雖然重返騎士,但我依然撐你!

勞耀全

戴咗 LeBron James耳機,我會唔會入到樽呢……都係等今晚發夢先再諗。
大細路買嘢天書
作為一個大細路(竟然自認係 kidult),見到呢本書、呢個封面,點會唔心郁郁,買咗至算。上星期去台灣逛咗幾日,除咗去咗「等一個人咖啡」(市府店)之外,誠品,又點會唔去呢,呢本書封面用咗熒光黃,一眼就望到,加上有「羅賓」同「哥斯拉」,再揭佢幾揭,啱睇喎。聲稱係「全球第一本涵蓋亞洲玩具店的旅遊專書」,新台幣 380蚊(港幣一百),有日本(東京大阪)、新加坡、香港同台灣玩具店介紹, OK㗎。

劉定邦

睇咗日本嗰 part,真係好想再放假飛一轉,正所謂,去到唔買都睇睇!

text:科技組

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()