靚抽王

識泊,一定係泊個好碼頭

Ads by Google

拍戲做 show日捱夜捱好,定係搵個有錢老公做少奶奶好?答案當然係見仁見智……就奇啦!咁未必係因為女星特別貪錢,只係藝人都會有收山嘅一日,都要搵個伴。而搵伴就同買樓一樣,要保值。咁有乜嘢係最能夠保值呢?梗係$$啦!不過要泊個靚碼頭都唔係易事,除咗要有如花嘅外貌,仲要兼顧埋戰略。所以今期荒謬現象學就同大家剖析吓一眾女星嘅上岸泳術係幾咁精湛!

Status:上岸中


Coffee進駐上海騎馬仔
殘廁事件後, Coffee林芊妤被大台踢走,要以教瑜伽為生。本來以為佢上唔到岸之餘仲搞到份工都冇埋,睇怕都永無翻身之日。點知佢順利過關,令人驚嘆佢撰寫劇本嘅功力。近日發現佢除咗同江湖人物「上海仔」行得好埋,仲成為馬主,個個星期去澳門同上海 san嚟嗰 gathering。哇,真係 everything under佢嘅 control喎,睇怕離上岸之日不遠矣。

成功之道:夠搏,能屈能伸,殘廁又得,澳門又得,瑜伽又得,佢會唔掂?我唔信。
Status:遇溺
楊思琦上錯賊船
上岸嘅成功例子好多,不過失敗都唔少。好似思琦妹咁,一向走純情路線,同李永豪一齊,被高登仔認為係萬中無一嘅唔貪錢港女。點知一個唔該,同空心老倌吳帥搭上,好啦,拋棄豪仔,諗住上岸,點知沉船遇溺一場空。到依家自己一個仲要湊 B,都仲係未搵到真命天子,我見猶憐!想上岸嘅姊妹們請借鑑。

失敗原因:明明大近視,卻冇戴一個近視泳鏡,上錯岸。

Status:上埋岸,順勢飛天


梁洛施後生可畏過三關
上岸好威咩?有人仲威過上岸,因為佢唔單止上岸,仲飛埋天。本身喺英皇做藝人嘅梁洛施,喺楊紫瓊介紹下認識李澤楷,小小超幫佢贖身,仲生埋 BB。生完 3個 B,同李生喺 2011年正式分開。唔……嫁入豪門,又唔使成為籠裏面嘅雀仔,仲下半世唔使憂,你話,佢係唔係最威?

成功之道:霸氣過橋抽板。
Status:上晒岸成功例子


徐子淇嫁個有錢人
知書識禮嘅子淇 BB曾經喺娛樂圈同情路上都載浮載沉。同洪天明分手後,亦同霍啟山傳過緋聞。似乎明白到愛呢樣嘢應該係實際啲好,於是同李兆基囝囝李家誠一齊,坐正做少奶奶,終於成為香港首屈一指嘅榮華富貴嫁女餅嘅經典幸福女人。

成功之道:知錯能改,未為晚也。


李嘉欣有得揀先係老闆
貴為跨世代女神,李嘉欣梗係大把追求者啦,先後有大劉及羅兆輝等加入戰團,參加者全部都係勁有財力嘅猛人。不過最後都係由中建企業太子爺許晉亨奪得美人歸。今時今日阿美人唔使撈,每日淨係等食同埋欣賞維港風景。

成功之道:生得靚,冇計。


徐濠縈另類有出路
老公陳奕迅雖然唔係乜嘢大富豪,不過都足夠俾徐小姐買名牌做大花筒。最重要嘅係就算佢亂使錢,老公都一樣力撐,所以喺呢個嫁個有錢人系列入面,我認為佢係巴能士( balance)得最好嘅。有咩好得過有錢使有人錫仲有個猛人唱歌俾自己聽吖?須知道,徐小姐走型格路線,唔係乜嘢典型大美人喎,市場價值波幅好大㗎。

成功之道:有眼光,識揀個忍得之男。

撰文:娛文樂

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()