三浦春馬冇朱古力、冇人魚線,可謂「板男身材」。但你咪理,佢就憑呢副「板男」衝出日本。

Ads by Google

亞熱帶
詩春戀賣肉 板男三浦春馬進擊強國
23歲嘅三浦春馬,憑劇集《最後的灰姑娘》跟 40歲篠原涼子大玩姐弟戀,由「男神」升格為「師奶殺手」,人氣衝出日本,更直搗強國。
早前夥拍被譽為「新一代國際女神」、亦係台灣男星吳奇隆女友嘅劉詩詩拍攝電影《深夜前的五分鐘》,爆發一段激情嘅「詩春戀」。
而拍攝期間,春馬着泳褲嘅「板男」身材造型喺網上瘋傳,戲未上,春馬靠「肉體」已喺內地爆紅。

 

雖然中、日兩國為咗釣魚台爭端不絕,但對藝人嚟講就話之你,搵銀先係王道。
《深夜前的五分鐘》( 10月 23號全中國上映)講劉詩詩飾演性格迥異嘅孖生姊妹,三浦春馬則係靠一隻永遠慢五分鐘嘅錶生活嘅錶匠,一個浪漫嘅相遇被大孖吸引。電影中段,講兩姊妹喺海外度假期間遭遇車禍,孖女中只有一個幸存。之後幸存嗰個返回春馬身邊,但呢個究竟係大孖定細孖?嗱,電影懸疑之處由此展開啦!電影早前喺釜山電影節放映,受到亞洲各地觀眾追捧,而第一次衝出日本接拍中國電影嘅三浦春馬,憑俊朗外形及演技,冧暈唔少韓女及強國女。

三浦春馬喺《深夜前的五分鐘》入面,俾時而家姐、時而細妹嘅劉詩詩搞到陀陀擰,都分唔到究竟邊個係自己真愛?

戲中劉詩詩同春馬有激咀場面,唔知吳奇隆會唔會呷醋呢?

喺拍攝期間,春馬一個着泳褲鏡頭被粉絲偷拍後放上網,結果喺網上瘋傳,亦間接幫電影宣傳。
賣肉突圍
4歲出道嘅春馬,演出經驗算豐富。 07年,簽約日本一線經紀公司 Amuse後,先後跟新垣結衣演出《戀空》、仲間由紀惠嘅《我 Miss係大佬 3》; 13年,跟 40歲嘅篠原涼子喺《最後的灰姑娘》一改乖乖仔形象,剝衫露股搏到盡。老實講,春馬身形其實冇乜睇頭,但一樣可以躋身「女生心中最愛肌男」,真係人紅乜都得。早前,大眾關注嘅「肌肉萎縮症」( ALS)喺全球捲起「冰桶挑戰」,咁啱咁蹺,由春馬主演以「肌肉萎縮症」為題材嘅《我存在的時間》亦剛於此段時間播放,不單劇集成為話題劇,亦令飾演患有肌肉萎縮症嘅春馬,加速上位。
忙到甩轆嘅春馬,忙完《深夜前的五分鐘》宣傳後,依家又趕拍改編日本人氣漫畫《進擊的巨人》電影版。日本藝能界現正處於青黃不接期, 23歲,愈大愈有型靚仔嘅三浦春馬,真係有排紅呀!

春馬曾於前年嚟香港出席品牌活動,之後去咗尖沙嘴食飯。

早前春馬嚟咗香港仲接受電視台訪問,唔講唔知,原來佢嘅普通話「還可以」㗎!


9歲(相機廣告)
自細俾阿媽踢入藝能界嘅春馬,工作量都唔少,好似呢個相機廣告,春馬當時只得 9歲咋!


14年《我存在的時間》
春馬人氣本來唔錯,加上早前全球為「肌肉萎縮症」患者發起「冰桶挑戰」,令喺劇集飾演肌肉萎縮症患者嘅春馬,憑此即躍上一線之位。


13年《最後的灰姑娘》
春馬喺劇集《最後的灰姑娘》上剝衫,即受到 22歲到 34歲日本女性喜愛,成功打入「最愛肌肉男星」第 6位,跑贏曾經排頭位嘅向井理。


電影版《進擊的巨人》
籌備兩年有多嘅《進擊的巨人》真人版電影,喺導演千挑萬選之下,終於搵到三浦春馬做主角,飾演「對抗巨人的青年」。都話啦,運氣嚟到,點擋都擋唔住㗎!

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()