咩啫,人紅咗係咁㗎啦!(設計對白)

Ads by Google

媽咪姐呢排雖然忙住去佔領區撐學生,但都有 keep住八㗎!好似近排傳出喺《老表,你好 hea!》身兼編劇、演員嘅王祖藍,成日喺片場改對白,搞到「好好先生」郭晉安都有火,忍唔住喺片場當眾寸佢。查實呢,事情又點止咁簡單!


有幕後人同媽咪姐講,祖藍可能見《老表,你好嘢!》收得,呢兩年返大陸密密做扮嘢節目又搵埋唔少人仔,個人都囂咗。呢次拍《老表,你好 hea!》,佢樣樣都要揸 fit,除咗鍾意臨時改對白,仲猛同自己相熟嘅傳媒透露劇情,搞到監製都有微言,怕觀眾知道劇情後無驚喜嘛!不過大台無人,祖藍依家紅咗,大家咪惟有啞忍囉。你以為祖藍同記者透露咁多劇情係緊張套劇?其實身為主角兼編劇嘅佢,竟然一直缺席宣傳活動,得郭晉安、萬綺雯同張繼聰等撐住,大家梗係唔 like啦!好嘞,等到王大忙人終於應承出席周四( 30日)嘅宣傳活動,大家度好搞扮鬼扮馬派對,諗住食正萬聖節襯番《老表》系列嘅扮嘢本色。
點知王祖藍一聽到 idea,就話佢係基督徒,唔可以慶祝萬聖節喎。就算宣傳人員話只係當開 party,佢都企硬唔做。咁你係主角大晒嘅,咪惟有唔用呢個 idea囉!萬綺雯、羅蘭姐同阿 Bob等成班演員本來好開心諗好扮相,依家不知幾咁失望。
媽咪姐想講,成日扮鬼扮馬嘅羅蘭姐都係天主教徒。信仰係要尊重嘅,但做人最緊要係問心無愧,與人為善啫。

身為天主教徒嘅羅蘭,唔介意趁住萬聖節扮鬼扮馬為套劇宣傳,但王祖藍以身為基督徒而拒絕。

今次宣傳《老表 2》時,王祖藍扮大星懶忙,連續缺席兩次宣傳,搞到向來人品好嘅郭晉安都忍唔住喺活動上黑面,以示不滿。

上輯《老表,你好嘢!》宣傳時,大家仲打成一片,個個笑到四萬咁口,寓工作於娛樂,但此情不再。

郭晉安啱啱同田蕊妮去咗大馬做嘢,非常 happy,同佢做《老表 2》宣傳嗰陣黑晒面嘅樣,真係差天共地。

劇中阿 Bob最好艷福,先咀索人妻萬綺雯,不過只係蜻蜓點水。但嚟緊嘅劇情,將會講佢同肥妹陳嘉佳撻着,仲激到連場舌戰,進擊到牀上。

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()