名氣生活

龐寵貽挑戰做鐵人

Ads by Google

雖然 CY話體育同宗教對香港經濟冇乜貢獻,但紹榮鋼鐵創辦人龐鼎元的孫女龐寵貽就好鍾意運動,她六歲學游水,亦是學校泳隊,每年她都會出埠滑雪,四年前開始玩 Pilates和瑜伽,「我一係唔做,我一做就做到最盡,可以一日上三次瑜伽堂。」最近她搞埋世界各地已普及的三項鐵人賽,「我覺得玩三鐵的人好有毅力,游水已經夠辛苦,仲要踩單車和跑步,可以訓練人的意志力。」


機緣巧合
龐寵貽有此機緣搞三項鐵人賽,皆因認識了女兒在聖保羅男女中學的泳隊教練周俏男,「個女每練一樣嘢我都跟住一齊,之前無識人玩三項鐵人比賽,周俏男曾是香港三項鐵人港隊成員,佢希望喺市區搞三項鐵人賽,難得有個運動由八歲至八十歲都有得玩,訓練到體能和意志力,不如一齊搞。」
大約在兩年前,她和周俏男成立香港業餘三項鐵人協會,推廣三項鐵人運動,他們先搞水陸兩項比賽,「三項鐵人難做啲,因為單車要封路,所以集中攞經驗先做游和跑水陸兩項。」去年他們便舉辦第一屆國際三項鐵人賽,找到新世界發展冠名贊助賽事。話晒弟婦鄭志雯是新世界發展執行董事,身為名人之後的龐寵貽,在搞活動時會否易過人?「搞呢個活動要搵海事處、警務處、運輸署、康文署。政府部門當然唔理你,我都唔擺名人姿態,參賽者只知我 first name,係搵 title sponsor容易啲,親戚關係,當然我會和鄭志雯及鄭志剛講一聲,不過我真係經 corporate channel照 submit proposal㗎。」鄭志剛更會主動提意見,「佢真係親力親為再約我見面去考慮,佢仲有意見,佢想第一年由小朋友開始推廣,舊年八至十二歲俾佢有水陸兩項,今年八歲開始都可以有三項。」

問龐寵貽會否參加下月三十日在尖沙咀舉行的新世界國際三項鐵人賽?「跑步我都有信心,不過今年落唔到場,因為自己做 organizer,無理由去咗玩。我希望一、二月唔使搞比賽可以去 train。」

嚟緊她會練好單車技術,「我唔想危害到其他參賽者。」

飲食方面,她諮詢了永健坊的澳洲運動營養師李淑玶(左一)的意見,當日就以 couscous、南瓜和蘑菇等做午餐。
自我增值
為了令賽事力臻完美,龐寵貽專登去北京讀 ITU的 event organizer及裁判課程,完成了 level 1的她,原定兩年內要做三場裁判才可以讀 level 2,她卻在半年分別去了德國、紐西蘭、成都和威海市做了四場裁判,就算做裁判要自費當去學習,她也在所不計,「做裁判都要幫手 set場和運作,體驗人哋個 course點設計,學到好多嘢。」
從來一係唔做,做就全力以赴的龐寵貽,小時候讀書總是優異生,「小學一定係頭嗰兩名,中學都係頭嗰堆人,都係成績優異。」在全美五大中學 Hotchkiss就讀時她更常常考第一,跟住考進著名的普林斯頓大學讀東亞研究,再去南加州大學讀傳訊管理碩士。「讀書係我 passion,無人逼我,但我會一直讀得好好。」彈鋼琴亦一樣,已達演奏級的她,亦曾去波士頓大學 The Boston University Tanglewood Institute的暑期音樂營,「呢個 camp好難入到,我要先寄錄音帶,再要去紐約 Carnegie Hall現場彈一次做面試,幾百個最終只係收咗十幾個彈琴的。」
龐寵貽一對十九和十六歲的女兒和兒子,又會否受她影響充滿運動細胞?「女游水,仔玩劍擊和打籃球,兩年前都有去西班牙參加我哋搞嘅三項鐵人暑期訓練營,我只對佢哋品格、價值觀上有要求,希望佢哋搵到自己 passion。」

周俏男指導她做器械強化肌肉,「因為衝線都要有力。」

一對子女亦和她一樣喜歡滑雪。

龐寵貽(紅圈)在聖保羅男女中學泳隊時的照片,前排左一是其弟弟龐超貽。

撰文:李苑欣
攝影:李敏軒
場地提供:永健坊
nextb@nextmedia.com

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()