U花 U草

恒管長髮女神 鄭曼妮:儲起自己嘅頭髮!

Ads by Google

係女人都貪靚,閒閒哋每個月花幾千蚊執靚個樣,特別係個髮型,整吓個頭做吓 treatment,成個人感覺清新晒!不過讀緊恒生管理學院工商管理副學士 Yr.2嘅鄭曼妮( Manni), 21歲女堅持唔去髮型屋剪頭髮。

 


恒生管理學院工商管理副學士 Yr.2 鄭曼妮( Manni)
小學畢業後由廣州嚟咗香港讀書,訪問期間成日將溫書掛喺口邊,「就嚟 mid-term喇!𠵱家 GPA都過 3,希望上到 degree啦,我仲想讀埋碩士㗎!」認真乖女!

自從兒時陰影後, Manni甚少去髮型屋,寧願自己親自操刀都唔想冒險畀人剪。

除咗睇書, Manni(中)都鍾意睇戲,「喺學校我係電影學會會員,雖然有免費飛派,但太多會員,好多時都要排長龍拎免費飛,不過入戲院睇戲真正原因都係為咗食爆谷!」

中文成績一向平平嘅 Manni,為了提升自己中文水平,幾年前開始寫愛情小說,將身邊人嘅愛情經歷加入幻想寫成小說,「都寫過 200幾頁㗎,不過上次搬屋唔見晒啲手稿,心痛死我,𠵱家睇小說多,最鍾意張小嫻!」

原來 Manni自從細個去髮型屋剪咗個冬菇頭之後,自此與髮型屋絕緣,頭髮長咗只會叫媽咪同家姐出手,「大概六歲剪咗個冬菇頭,剪完喊咗好耐,覺得自己好醜樣,我就決定以後都唔再出街剪頭髮,前面就自己剪番,一嚟我唔使驚屋企人會亂咁剪,二嚟出去剪頭髮要幾百蚊,慳番啲錢好過!」
現在長髮長到過腰嘅 Manni,仲試過儲起自己嘅頭髮做紀念,又試過呃前男友自己識剪頭髮,幫對方操刀,但 Manni自稱拒做髮型師,「我唔得㗎,我純綷好珍惜自己啲頭髮!日日都會護髮,避免吹頭,一有開叉就自己修吓,可能因為自己鍾意睇古裝劇,覺得長髮嘅女仔有種古典美、好吸引,自從嗰次冬菇頭之後,我都冇剪過短頭髮喇!」

撰文:葉浩婷
攝影:何榮亮
形象及化妝: Kika Wong

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()