甘宇成同秀英嘅年齡相差太大,為咗減低抗拒感,宣傳海報只係用側面相,睇唔清都好嘅。

 

非港劇讀

《我人生的春天》 父女戀都 work!

Ads by Google

姐弟戀、母子戀呢啲題材,喺韓劇界已經拍咗幾年,睇到幾悶吓。近期嘅《對我而言可愛的她》同《我人生的春天》就玩複雜嘅倫理關係!而《我》劇嘅男女主角戲裏年齡仲相差 18年,戲外 44歲嘅甘宇成同 24歲嘅「少女時代」秀英,實際上差 20年㖭。
嘩!話「父女戀」都仲得呀,重口味到呢!

 

有 4年冇拍戲嘅甘宇成, 06年憑電影《王的男人》,橫掃多個韓國電影節「影帝」獎項,一聽就知係演技派。今次甘宇成肯出山拍劇,對之前被評「戲屎」同「收視毒藥」嘅秀英嚟講,有前輩帶戲同指導佢嘅演技,可以話係執到寶。

戲中嘅甘宇成幻想同秀英攪奶整芝士,似足《人鬼情未了》,但感覺好「父女」。

甘宇成(左)同李準基(右)當年憑《王的男人》攞咗唔少獎,呢套戲仲成為佢嘅代表作。

「少女時代」出道 7年,時有聽聞搞小圈子,月前再爆隊員逼 Jessica退團,秀英仲喺節目為呢件事喊住道歉。多女人嘅地方,是非都多。
睇番呢套劇,做過換心手術嘅駐院營養師李春天(秀英飾),喺同男友姜東旭(李浚赫飾)準備結婚前,遇上男友哥哥、畜牧企業 CEO姜東河(甘宇成飾)。幾次偶遇後,佢哋仲互生好感愛上對方,之後春天發現捐心臟俾自己嘅人,就係東河意外離世嘅老婆。嗯!兩兄弟同一個女人,咁一家親嘅?
好彩導演拍攝手法點到即止,即使有咀戲,都錫得斯文。話晒秀英係偶像組合,同大叔甘宇成外形本來就唔襯,好在甘生嘅演技夠自然同內斂,老少配唔覺突兀。難怪《我人生的春天》目前 keep住同時段第一位,比起 Rain同 Krystal嘅《對我而言可愛的她》,觀眾更 like!

正所謂不打不相識,春天去東河嘅鮮肉店買肉,中途發生誤會,東河意外推跌春天。呢啲誤會,最後咪撮合佢哋囉。

春天知道東河有一對仔女,唔介意做後母幫手湊仔,阿女開口話希望春天做佢媽咪。

因為醫院換咗牛肉供應商(即係東河間公司),春天俾人尋仇,東河經過救咗佢,仲搞到自己隻手受傷。

春天同醫生男友東旭準備訂婚,仲計劃未來生一仔一女,建立幸福家庭。點知春天忽然轉軚愛上男友大哥東河。

上年被人影到拍拖但唔認嘅秀英,今年初見隊友潤娥認咗拍拖,佢都唔執輸,喺自己再被影到同演員鄭京浩約會時直認戀情。
愛之方程式

東河返故鄉牛島拜亡妻,春天咁啱又去拜祭捐心臟俾佢嘅有心人(即係東河老婆),點知春天踩到海苔跌咗落海,要東河救佢。英雄救美呢招,唔少得。

家人反對春天同東河相戀,但春天為爭取幸福堅持所愛,仲主動錫東河。

春天為證明自己對東河嘅愛,唔關佢個心事(移植咗東河亡妻個心嘛),唔介意俾東河摸心口。

撰文:張韋弘

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()