上周一( 13日),韋綺姍接受本刊記者訪問,年近 50的她,樣貌與廿年前分別不大,身形還 keep得非常好,不過她說:「我老咗好多喇!」

娛樂喧
神隱廿年 蔣志光勸掂復出 韋綺姍:我呢個師奶仲得喎

Ads by Google

當年一首〈相逢何必曾相識〉,令蔣志光與韋綺姍成為樂壇情侶。事隔 24年,二人再度合作,在大台台慶劇飾演夫婦。今次隱退多年的韋綺姍肯出山,全靠蔣志光一個無厘頭電話,加上她兩位千金都大個女識照顧自己,韋綺姍認為啱 timing才膽粗粗復出拍劇。
難得韋綺姍唔覺拍劇辛苦:「原來我呢個師奶都仲得喎!」神隱廿年專心湊女的師奶,一樣有市場,明年 3月更會拍住焦媛做埋歌舞劇㖭!

樂壇情侶檔
90年一首〈相逢何必曾相識〉,令蔣志光與韋綺姍紅極一時。呢首歌喺當年樂壇頒獎禮攞咗唔少獎,仲成為經典 K歌。

為了相夫教女,韋綺姍一直神隱。 96年她奉子成婚,在加拿大誕下長女 Natasha便回流香港,之後再生細女 Helena。對於犧牲了演藝事業,她從無後悔:「係我選擇結婚,做一個老婆嘅責任去照顧小朋友。細個時父母都要做嘢,冇人理我,我唔想自己小朋友冇人理,黐自己一定好過黐工人。呢十幾年我一直跟住佢哋成長,所以幾乎斷晒其他人聯絡。」近年女兒漸漸長大,韋綺姍亦有教授圈中歌手唱歌,糖兄、糖妹及王若琪都是她的學生。
王祖藍加入游說
韋綺姍因女收山,現在亦因女出山。「大女 18歲,細嗰個都 15歲,佢哋唔想我再跟出跟入。咁啱有日蔣志光打俾我,我心諗你又想搵我錄歌呀。但佢講咗一輪我都唔知佢講咩,最後佢話其實想搵我拍劇,我同佢講唔好玩啦!點知王祖藍就攞咗個電話聽,叫我出嚟拍劇玩吓,仲話我肯拍乜都得。廿年來冇人搵過我拍劇,講真我都想試下自己得唔得,估唔到我呢個師奶仲得喎!」
為此丈夫可有反對?她說:「佢都心知啦!我擺咗咁多時間喺啲小朋友度,依家係時候做番自己鍾意做嘅嘢。」
處女拍劇毫無經驗,韋綺姍又不懂中文字,幸得 DJ好友陳永業幫手,才能熟讀劇本。而每次與劇中丈夫蔣志光做對手戲,她都非常緊張,「其中一場志光要捉住我隻手狂喊,佢喊到七情上面,最後我同佢講『唔好意思,我唔記得咗要講咩。』」

拍搞笑劇
韋綺姍全面復出幕前,首次拍大台喜劇,單睇造型都已經夠搞笑。

老友飯敍
雖然隱退 20年,韋綺姍仍與舊拍檔蔣志光、黃寶欣保持聯絡,早前更與唱片公司同事飯敍。

好友相助
韋綺姍全靠相識廿載的 DJ好友陳永業幫她把劇本逐句讀出並錄下,她才能多次翻聽,為此她非常感謝對方。

跟足 18年
韋綺姍大女 Natasha四年前去英國讀高中,今年返港入讀大學,早前更陪媽咪到電台做節目。

細女 Helena性格獨立剛強,早前更去參加警隊搞的紀律部隊活動。

韋綺姍與一對女兒感情要好,她說大女喜歡唱歌表演,不時參加公開的唱歌比賽,早前更打算參加《中國好聲音》,有其母必有其女。
3月演歌舞劇
韋綺姍復出拍劇即上戲癮,據知明年 3月她還會拍住焦媛演出一連 14場的歌舞劇。記者致電焦媛,她對韋綺姍讚不絕口:「舊年睇完佢一個表演,不得了呀!年初知道佢終於出番嚟,我同自己講一定要同佢合作。咁啱春天劇團籌備改編歌舞劇《高帽奇緣》,所以搵咗佢一齊做女主角,呢齣係懷舊歌舞劇,又要唱又要跳。韋綺姍好勤力,一早拎咗劇本去背。」
歌舞劇中要唱國語歌,韋綺姍再次受到挑戰,不過她信心十足說:「焦媛好就我,當中有啲歌佢俾我唱英文版。依家拍劇做歌舞劇,如果做得好,有觀眾緣,遲啲可能連電影都有得拍。」遲了 20年的發圍,有心唔怕遲。

明年 3月,韋綺姍將與焦媛合作演歌舞劇,對於與作風出名大膽露骨的舞台劇女王合作,韋笑言:「佢知我保守,唔會要我做大膽演出嘅!」

韋綺姍另一身份是唱歌老師,糖兄、糖妹與王若琪(左)都是她的愛徒。
安仔扮長毛
韋綺姍有份演出的大台台慶劇以喜劇形式諷刺時弊,有部分劇情涉及政治,出街不過數集已有不少示威、政治辯論的場口,其中郭晉安參加辯論大會被萬綺雯怒罵的情節,有網民認為是影射早前長毛梁國雄於《城市論壇》被圍攻的一幕。

 

當年輸給梅姐
韋綺姍( Rita Carpio)年近 50,是菲葡混血兒,出生於音樂世家,父親夾 band為生,堂姊是巨肺歌手杜麗莎。她在 1982年第一屆新秀歌唱大賽中輸給梅艷芳獲銀獎,之後加入樂壇,後在台灣出過兩張唱片。 1990年與蔣志光合唱〈相逢何必曾相識〉 hit爆,成為 K歌經典。

當年韋綺姍參加新秀,輸給梅姐奪銀獎。

原來早年韋綺姍都湊熱鬧,做代言人減肥。

出過六張唱片的韋綺姍,至今依然是唱得之人。

撰文:娛樂組 
攝影:攝影組

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()