fuck1.jpg

處女劇迎戰
首次拍電視劇的李心潔,在無心插柳下,其處女作《選戰》大有機會成為港視王維基單挑大台的秘密武器。

滾熱辣
撞正 TVB台慶日啟播 港視用李心潔撼黎耀祥

Ads by Google

不獲發免費電視牌照的港視,幾經艱辛,終鐵定於下月 19日以網上形式開台,與大台台慶日撞到正,公然向大台挑機。有消息指港視頭炮將會由鬼后李心潔參演的《選戰》開戰。為求食住佔中熱,李日前與有份主演的廖啓智,秘密落旺角佔領區拍外景。
眼見對家強勢出擊,以往依賴慣性收視的大台,今次亦不敢怠慢,將原先下月初播映的搞笑劇《醋娘子》抽走,硬推 3屆視帝黎耀祥主演的《名門暗戰》迎戰。雖然未知勝負,不過電視劇有得揀,市民唔使一味硬食維穩膠劇囉!

臨危受命
大台小生唔夠用,據知現時新劇存貨唔多,因此惟有硬推近排連仆三劇的黎耀祥所演的新劇《名門暗戰》上陣,迎戰港視的《選戰》。

自稱香港仔王維基早前搞免費電視台,結果屢遭政府打壓,最終王維基於網上翻生再開台,更宣布用全民公投,講到明市民可以自決睇邊套劇,明顯想挫一挫大台銳氣。
落區撐學生
早於未正式宣布開台前,滿肚密計的王維基,忽然以重金每集 10萬酬勞,利誘當時剛爆出老公彭順偷食小三 Liddy的「鬼后」李心潔,參演政治色彩濃厚的《選戰》。處女拍劇,噱頭十足。據知李心潔在劇中飾演 2022年香港特首參選人之一,參選前她一直投身政界為工人發聲。由於題材食正近日佔中熱,港視內部亦覺得此劇最得觀眾歡心,故成為開台劇。知情人透露:「其實上月尾佔中開始嗰陣,王生已經同我哋講,話呢個時候播《選戰》啱晒 timing。佢仲捉咗呢套劇嘅編劇開會,叫佢哋加插啲佔中元素落去,落區都係佢提議。佢話想拍啲激啲嘅場面,所以編劇就揀咗去旺角示威區。其實旺角有咁多社團嘅人,幕後人員擔心藝人嘅人身安全,不過心潔同智叔都話冇問題,仲話有機會都落去同啲學生傾吓偈㖭。」而李心潔接拍《選戰》前,講明拍完劇不會現身一切宣傳,但得知此劇極有可能成為開台劇,便仗義答允出席劇集的所有宣傳活動。

哈韓扮潮
為了迎合一眾師奶口味,《名》劇開拍時,所有男演員清一色要剪都敏俊頭,誰知弄巧反拙,遭網友抨擊臨老先扮潮。

佔旺踩場
考慮到警方在未來數日進行清場,李心潔和智叔日前直踩落旺角佔領區實地拍攝。
千萬落廣告
為打響頭炮,港視下月初將會進行連串鋪天蓋地宣傳攻勢,更會投放逾千萬在各大媒體靚位落廣告。除了在紅隧放大型海報,據知更會在有線賣廣告。知情人續說:「敵人嘅敵人係朋友,所以佢哋唔介意俾錢喺有線電視落廣告。總之王生講到明呢場係硬仗,絕對唔可以輸。」而下月 19日的開台大日子,港視將會在金鐘萬豪酒店筵開過百席,更已廣發英雄帖,而約滿的藝員如林文龍、黃日華、廖啟智和艾威等已落實現身撐場。

食正佔中熱
在《選戰》中,劇情講冇後台撐的李心潔決定參選特首,與奸到出汁的對家廖啟智大鬥法,食正近期佔中要求 CY落台的 timing。

踩行趕戲
由於《選戰》幾乎可以肯定成為港視開台劇,為趕及下月 19日開播,近日李心潔等港視藝人,日以繼夜趕工。
王祖藍不滿
港視突然宣布開台,大台隨即遭打亂陣腳。眼見場仗殺到埋身,由王祖藍、萬綺雯主演的《老表,你好 hea》就臨時變陣。據知此劇原定只拍了 25集,但打仗要緊,綜藝科揸 fit人余詠珊隨即跨部門開會,最後下令劇集拖長至 30集。知情人透露:「 Sandy(余詠珊)認為《老表》好笑,班師奶觀眾會鍾意睇多幾集,但佢唔明啲笑位一拖長就唔好笑。祖藍今次編劇度橋一手包辦,專登搵咗好多上咗年紀嘅歌星喺套劇入面唱歌,目的係想出 sound track,想食住個勢開舞台劇。佢驚加長版會有反效果,打亂佢嘅財路,所以套劇未出街前搵過 Sandy傾,不過 Sandy一意孤行,勸唔掂。」

手指拗出
吳啟華身為大台劇《再戰明天》的男主角,日前竟在《再》飯局中,公然向王維基𢱑撈說:「梗係要恭喜王生啦,有好劇本記得搵我!」據知大台高層對吳頗不滿,但礙於小生所剩無幾,只能大事化小。

卡士弱雞
由於台慶亮燈屬大台一年一度向廣告商晒冷之作,即使身在外地開工的小生花旦,亦要奉命現身撐場,但今年撐起亮燈的就只有二線姐仔如高海寧和外援救兵馬德鐘和黎耀祥等,卡士弱到冇朋友。
視帝祥憂心
除了夾硬拖長《老表》,由胡杏兒、吳卓羲、羅仲謙、岑麗香擔正的喜劇《醋娘子》,原定下月初緊接《再戰明天》播出,但日前亦要臨時被抽起,改由視帝祥的《名門暗戰》頂上,硬碰港視。知情人續說:「 Sandy同珍姐(曾勵珍)都覺得《醋娘子》太小品式,同《選戰》劇種好唔同,驚戲味唔及人,所以決定用祥仔呢套對撼,話晒同樣係講明爭暗鬥。佢哋覺得祥仔始終有班捧場客。」可是,黎耀祥對上三套劇《神探高倫布》、《法外風雲》和《載得有情人》皆仆,至於其食糊作《巾幗梟雄 3》,亦因涉及雞姦強姦等重口味情節,而播放無期。因此唔少幕後認為黎耀祥近排手風唔順,擔心大台今次好心做壞事,再一次打爛其視帝金漆招牌。

急忙變陣
港視來勢洶洶,大台亦不敢怠慢,急急將搞笑劇《醋娘子》抽起,改播《名》劇。至於由王祖藍孭飛的《老》劇,由原本的 25集拉長至 30集。

群星撐硬
港視千呼萬喚終於開到台,最興奮的莫過於一班曾替港視拍劇的藝人,不過始終是網上電視台,並非人人都有信心。

黃日華:希望順利
舊年開台唔成,帶來沉重打擊,希望今次順順利利!

艾威:信心?麻麻?!
講真,真係麻麻哋有信心㗎咋,始終都唔係一個真正電視台。

劉玉翠:希望成功啦
佢哋有搵我返去幫手拍宣傳片。如果要到我幫手,有時間我一定幫,希望佢哋今次成功啦!
朝早 6點煲劇
港視今次以 OTT( Over-The-Top)形式免費播放電視節目,只要有智能手機及小米盒子等電視解碼器就睇得,十分方便。而主席王維基透露頻道每朝 6時便播放劇集,打破晚上煲劇的傳統。初期每日播 2小時劇集、半小時綜藝節目,以及 4小時的外購劇,並會推出電子購物頻道。觀眾只需在網上填上電郵、性別、年齡及收入四項資料登記,便可成為用戶,隨時隨地免費煲劇。

新鮮題材
港視大大話話拍了 17套劇,如今開台有望,一眾劇集從倉底翻生,其中有幾套題材夠特別,人物夠新鮮,絕非是但之作。


《三面形醫》
主演:姜大衞、林文龍、艾威
以整容為題材,絕對開創電視劇先河,有幾場戲拍攝飾演整容醫生的林文龍向病人開刀,針針到肉,十分逼真。


《歲月樓情》
主演:夏雨、鮑起靜、黃日華
單是影后鮑姐、視帝夏雨再加好戲之人已有叫座力,仲講埋港人最關心嘅住屋話題,易引起共鳴。


《來生不做香港人》
主演:張可頤、劉美君
視后張可頤過檔第一擊,配搭金馬影后劉美君飾演客家女人,新鮮感爆燈。

撰文:娛樂組 
攝影:攝影組

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()