名人潮

反填鴨式 楊婉儀倡美國互動教學

Ads by Google

香港人創意無限,近日的佔中行動就出現港式搭棚路障,惹來全球關注。教育方面,香港昔日填鴨式教學,小朋友從小就要練成十項全能,更要有無限精力面對大量功課和一系列課外活動。
港姐冠軍楊婉儀,自小於美國長大,對教學理念特別重視。 3年前她開設教育中心,將美式教學引入香港,最近她更投資百萬、攞正牌開辦國際幼稚園,「嚟教育中心嘅小朋友有讀 local或者國際學校,我發現當佢哋讀書開心嘅時候,吸收、學習同記憶力都會好好。」

 

香港學位緊絀,父母馬不停蹄為子女撲學校。開辦教育中心、親自執教鞭的楊婉儀,今年 8月升級為校董,於紅磡開設國際幼稚園。「做咗幾年教育中心,見到小朋友喺自己教學方法中好開心咁成長,好想佢哋一個禮拜唔止得兩日學習。」

3年前,楊婉儀踏足教育界,於灣仔開設教育中心,去年更拓展至澳門開分校。

集體創造
楊婉儀採用互動教學,以不同活動引導學生學習,讓學生共同創作畫畫之餘,亦令他們學懂團體精神。

外籍教師
「無論英語、普通話老師,一定要係 native speaker,有嚟自愛爾蘭、美國、印度嘅。」

多國學生
「學生嚟自好多唔同地方,大部分係香港學生,有好幾個係外籍人士,嚟自印度、美加等,亦有啲內地學生。」

千呎遊樂場
踏進幼稚園有大型遊樂場,一邊為落地玻璃,有陽光照射,空間感十足。

幼稚園位於紅磡昇御門,設有戶外遊樂場,「呢個地點比較方便啲,香港島嘅學生都係過一條隧道就到。」
美式教學
物極必反,香港填鴨式教育令學生、家長透不過氣。自小於美國長大的楊婉儀,指互動教學方法,對小朋友學習有莫大幫助。「返學應該係開心嘅事,我冇喺香港讀,但聽朋友講過,知道有部分學生讀書好辛苦、好大壓力,所以開美式幼稚園。」
幼稚園用美國教學理念,讓小朋友於活動中學習,增加自信心。「互動嘅教學方法唔係淨係好多活動,會好 interactive,小朋友之間好多機會接觸,一齊做一啲 project,同老師好多溝通互信。」除了互動教學,楊婉儀對小朋友語言方面要求亦相當高。「我哋教嘅英文係 fluent,希望小朋友英文程度係接近 native,就算普通話都係一樣,咬音、咬字都係好正。所以英文係跟美國 standard,叫 Common Core State,即係美國咁多個州同一個標準。」

戶外遊樂場
面積約千呎嘅室外遊樂場,鋪滿木地板,種有小植物。「有 outdoor可以種植,或者玩吓沙、玩吓水。」

「薄荷葉由學生自己種,佢哋學識整 pasta之後,可以放上去做自己嘅茶點。」

幼稚園設有 9間課室,包括音樂室及圖書館。「教師親自為課室布置,會有學生嘅作品、生日樹等,令佢哋更投入學習。」

簡潔廁所

幼稚園的廁所設計簡單,男廁設有多個坐廁,尿槽地下印有小腳印,讓小朋友如廁守紀律。

撰文︰蔡靜雯
攝影:劉玉梅
錄像︰蔡政峰

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()