練氣擔正
為了北上拍劇做男一,近日高鈞賢積極 keep fit。上星期,本刊就發現他在寓所附近跑步。

Ads by Google

娛樂喧
拍一集多過大台月薪 高鈞賢劇價贏馬明
離開大台嘅藝人,個個創出一片天。繼林文龍、謝天華、李思欣後,踎足九年的高鈞賢( Matthew)早前離大台外闖,短短一個月曝光率急升。而更令他吐氣揚眉的,是他已迅速接了兩部內地電視劇,坐正做男一。
雖然高鈞賢首次拍內地劇,但劇酬已媲美大台一線小生馬國明及黃宗澤,每集收三萬人仔。現在拍一個劇,收入遠勝以往在大台一年人工。捱了九年終於發圍,高鈞賢忍唔住暗寸:「當讀咗九年訓練班!」

高鈞賢 05年贏「香港先生」冠軍入行,在大台捱足九年,發展平平,更由男配角貶為二打六。上個月他終於決定與大台「分手」,曝光率反而急升。近日 Matthew已簽了內地經理人「盛世強音」,更話咁快接了兩個劇,本周二( 14日)便起程往橫店開劇。
簽胡兵舊公司
「離開大台前, Matthew已經見過好多內地公司傾經理人合約,華誼兄弟對佢都有興趣。最後佢決定簽『盛世強音』,因為胡兵剛走紅時都係簽呢間。 Matthew覺得公司識湊 artist,又可以幫佢電影、電視雙線發展。加上呢間公司有自己嘅製作,工作量有一定保證。」知情者說。
Matthew暫時主力拍劇,他先與關智斌在《山海經》合作,明年初更會擔正拍偶像劇《新神探聯盟》。雖然 Matthew是內地劇的新人,但每集的酬勞也有三萬人仔,拍一集已經多過以往在大台二萬五月薪,十分和味。

近日播出的《再戰明天》(圖)及《飛虎 II》,都是高鈞賢告別大台之作。

商場惡補
周一( 13日),高鈞賢剛由台灣回港,到 food court找國語老師補習。北上搵食,梗要識「煲冬瓜」。

添衣北上
高鈞賢北上拍劇,高母驚兒子唔夠衫,陪埋佢揀貼身用品。

超市入貨
買完衫,高鈞賢為免在國內水土不服,捉埋阿媽到超市買公仔麵及即食麥皮。

高媽媽同高鈞賢揀麥皮及穀類食品,錫仔錫到燶。
學國語北上

有線都有積極斟高鈞賢過檔,早前他與張堅庭,亦為有線節目《十萬蚊港女大翻身》做嘉賓。

上周末, Matthew趁未開劇,到台灣為雜誌拍照。周一早上回港,他為了把握時間,先與普通話老師在 food court操國語,然後會合母親 shopping,買些日用品準備北上。受訪時,他對未來充滿信心,強調自己走得啱。
記:記者高:高鈞賢
記:買咗好多嘢喎?
高:因為要北上拍劇,聽日( 14日)就出發,會逗留三個月,都係買啲便服同食物。
記:之前喺 food court學國語,唔怕俾人望咩?
高:今朝先喺台灣返,冇時間,又想學多堂先走,冇計。其實我都學咗三、四年,老師係我媽咪介紹,係鄰居。
記:接咗兩套內地劇,信心都大咗?
高:係呀!開頭都有懷疑過,依家都覺得自己走得啱。
記:等咗九年至有機會上位,有乜感想?
高:當讀咗九年訓練班!
其實 Matthew為了拍內地劇,也推了不少工作,連早前有線電視有意為他度身訂造的「母子泰國旅遊特輯」也無法成行。不過他說:「有線話可以就我哋,可能年尾先拍。」不但小生輪住走,就連昔日與大台關係良好的英皇歌手亦拒續約,看來大台藝人真的買少見少。
大台壓小生價
愈來愈多藝人北上賺人仔,皆因內地劇酬很高,即使一線小生,大台最多只俾到三、四萬,確實難與內地動輒十多萬一集比較。

郭晉安  5萬
劇酬屬經理人合約(即「親生仔」)中最高,約 5萬一集。不過,他內地劇價高達 15萬,難怪他近年在大台是一年一劇。

黎耀祥  4萬
屬部頭約,不過產量多,雖然祥仔以大台為先,但他在大台的劇價只屬中等,約 4萬。

黃宗澤  4萬
林峯、陳豪離巢後,近年穩坐一線,但在大台的劇價只有 4萬,難怪他寧願搞生意減少拍劇。

馬國明  3萬
雖然忠心於大台,不過現時他在大台的劇酬為每集 3萬港紙,少過高鈞賢 3萬人仔。

撰文:娛樂組
攝影:攝影組

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()