同你吟一吟

苟姑娘英唔起

Ads by Google

打住台慶劇招牌,但只係逢星期日播嘅《飛虎 2》日前喺將軍澳電視城做宣傳,一班飛虎打扮嘅壯丁,每人手揸一碌鋁管,砌成高架,俾鍾嘉欣、苟芸慧企高扮英。


凌空企高兩、三呎,鍾嘉欣企定攞好平衡就掹槍擺 pose,乾淨俐落,至於負磅重嘅苟姑娘,就算全程有班壯丁伸晒手俾佢捉住,一樣驚到腳震,一啲都唔英。
俾情緒同體重困擾,苟姑娘信心零蛋,其實有段時間佢個個星期去行山,狀態已有改善,可惜唔夠定力,好快放棄。八珍所知,有圈中人壓力大到晚晚要食幾粒安眠藥,但自從開始日行五公里,不但唔使再啪藥,仲喺兩個月內減咗 30磅。管理自己身體,靠意志比藥物好,苟姑娘,不妨好好考慮吓!

羅仲謙、馬德鐘同梁烈唯逐個扶住,苟姑娘終於企定,但就驚到硬晒軚,好唔掂。

鍾嘉欣一企上去,兩秒就搵到平衡,仲可以轉 pose,有膽色。

同馬德鐘、梁烈唯一樣,羅仲謙同黃智雯都有份冧庄拍《飛虎 2》。

撰文︰八珍

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()