me.jpg


Coco Chiang綠色真皮褸$3,500深藍色間條上衣$499深藍色間條半截裙$499all Marks& Spencer 

cover face

蔣怡 重拾夢想

Ads by Google

真心,蔣怡表面睇,真係幾 cool,點知埋身訪問,先知係開籠雀一隻。
去年跟拍拖十三年的珠寶設計師翁狄森拉埋天窗,忽然由做女變成人妻兼人母,感情豐富,人之常情。
而她也樂做「煮飯婆」,決心仲大到於訪問隔日,飛到倫敦學廚 9個月,夠晒專業!
「呢個一直係我夢想,你唔會估到係老公鼓勵我去學廚!
「同時想鼓勵一班媽咪,唔好放棄自己夢想!女人要有自己事業,先可以為自己保鮮!」
搵到夢想固然值得恭喜,但囡囡翁容得一歲人仔,分隔成年真係捨得?
「梗唔捨得!但我對煮嘢嘅 passion大到就快爆煲,唔去會後悔一世!
趁囡囡仲細唔係好認得人,讀完返嚟仲有得教。」
口雖說得瀟灑,但一提到囡囡,就開始眼濕濕。
「我似足心太軟,外表睇落好 tough,實則好易喊。」都話女人水造,明嘅!
「去,可能會 miss咗囡囡一啲嘢;但唔去,就 miss咗我第一次!」
37歲的蔣怡身體力行話你知,夢想,永遠有心唔怕遲。不過大前提係,你有個好老公做後盾先得!

Profile

Coco Chiang蔣怡
出生日期: 1977年 5月 12日(金牛座)
出生地:江蘇省常州市
身高: 6呎
三圍: 35、 24、 36
體重: 120磅
語言:廣東話、普通話及英語。
學歷:廣州外語學院畢業
簡歷: 98年參加廣東省模特兒大賽進入前 10名。 99年參加上海國際模特兒大賽再進入前 10名。 00年來港發展。 02年跟星爺合作拍生力啤電視廣告,憑「如夢」一角而走紅。 05年轉到台灣發展。 10年起重返香港娛樂圈。 13年和珠寶設計師男友翁狄森( Dickson)結婚,同年生下女兒翁容。
主要作品:電影《新紮師妹 2美麗任務》( 03),《新警察故事》、《墨斗先生》( 04)。電視主持《蔣怡新煮意》( 05),《時尚講義》( 09),《美食法庭》、《台灣好味道 3》( 10),《蔣怡的前 4後 6》( 13);電視劇《籃球火》( 08)、《敲敲愛上你》( 09)、《泡沫之夏》( 10)、《廉政行動 2011》( 11)、《勝女的代價》( 12)。
微博: http://www.weibo.com/u/1730822164 


有夢想要去追
 


Coco Chiang粉藍色羊毛外套$2,100黑白色圖案針織上衣$529黑色真皮貼身褲$1,900灰色手袋$659黑色拉鏈短靴$1,500all Marks& Spencer冷頸飾 stylist's own 

別看蔣怡外表冷豔,實情好感性,仲好眼淺,一提起即將遠赴倫敦藍帶廚藝學院進修,要同囡囡分開 9個月,她鼻子一酸,眼圈紅了一大片。
「其實每三個月趁 break就會返嚟一次,但離開日子愈近,愈 emotional。最近成日帶囡囡去玩,想製造多啲同佢嘅開心回憶,見佢玩得愈開心,我就會喺條街度無端端笑住喊,唔理人點睇㗎!」
分離從來不易,何況係骨肉至親? Coco愈講愈眼濕,搞到我都有啲不知所措。冷靜下來後,她自我解畫。
「其實我鍾意煮嘢食已經十幾年,如果我早啲認清自己 passion,就唔入呢行去做廚師。其實幾年前已經決定去,點知後來有咗 BB,冇辦法唔放棄。依家日日煮嘢俾屋企人食,再次燃起對下廚嘅熱情。無論湊 B幾辛苦,入到廚房,就會開心番。
「我老公係一個好着重夢想嘅人,覺得有夢想就要去追。過去一年他實現了自己夢想,為公平,佢都希望我有呢個機會。」
計我話,學成歸來,最大受惠者,都是翁生,梗支持!
但要為夢想放棄女兒珍貴的成長片段,魚與熊掌,真係好難揀!
「其實我覺得 BB一歲前成長時間先係最重要,我陪到佢已做了本份,趁 BB依家記憶仲好有限,唔會記得我離開過。呢段時間可能佢會被寵壞,但我返嚟佢都係兩歲,仲有得教番好。」
怕唔怕返嚟囡囡唔黐你?
「我都想囡囡黐老公多啲!老公工作忙,少時間同 BB相處,他一抱,囡囡就喊,希望今次離開俾機會佢哋互動多啲。我好易搶佢返嚟㗎咋,哈哈!」


女人要保鮮
 

描述蔣怡,大多圍繞一個「索」字,從來冇諗過 Coco行事做人咁勇往直前,一副女強人姿態。
「女人要有自己事業先會開心。(事業心重?)我唔算,我唔使要咩成就,只係想增值自己,要同社會有溝通,先可以 keep住自己吸引同 fresh,能夠同老公十幾廿年都有嘢傾。」
現代靚媽,講明唔做黃臉婆,但面對名模頭銜,同樣耍手擰頭,咁反高潮?!
「其實做 model從來唔係我夢想,只是我初入行時的搵食工具,計落只係做咗五年,但香港人真係好可愛,我冇行 show十年都仲叫我名模!(唔開心?)頭幾年剛轉做藝人時的確有,依家睇開咗,其實大家叫我名模而唔係前名模,代表我仲 keep得幾好,都係一個鼓勵。
「以前我鍾意演戲,但可能因為外形關係,所演角色都好類似,好悶!後來多咗機會主持飲食同旅遊節目,開正自己嗰瓣,又發揮到長處,直情 enjoy到唔當係工作。」
要贏,當然唔能夠輸在起跑線上, Coco直言揀藍帶都係因為夠出名。讀完返嚟,無論主持飲食節目、開餐廳定教人煮餸,自己都有自信同 power啲。「我仲想將法式料理嘅擺盤技術融入中國菜中,變得唔再老土。」講烹飪,滔滔不絕,咁有想法,絕對唔係玩玩吓!


87年10歲人仔,已經眼大大面尖尖,外加手長腳長,美人胚子初成。 

10年近年主攻主持,為有線飲食節目《美食法庭》在台灣拍攝著名小吃,直言寓工作於娛樂。 

14年囡囡滿一歲, CoCo就為她搞了個慶生派對,話明唔想囡囡做童星,要保留佢童真。


快樂空間立體咗
 


Coco Chiang米白色毛毛背心$1,200裸色連身裙$699淺粉紅色金屬手鏈$299吊飾長頸鏈各$259深灰色綴毛毛側扣高跟短靴$1,500all Marks& Spencer 

這年頭,做女人難,難在家庭、事業兩兼顧。忽然由做女變了阿媽,更是百般滋味。
「以前我唔鍾意小朋友,從冇諗過我能夠愛一個小朋友愛到咁。無論佢點激到你死,但下一秒又可以令你開心到連眼淚都標埋出嚟。
「一直以來,我同老公都覺得能夠二人世界到老,都幾浪漫吖!點知有了囡囡後,以前覺得已被填滿了快樂的空間,忽然由 2D變成 3D,成個世界立體咗。」
Coco生完女後,又喊又笑,一度患上輕度抑鬱。「可能荷爾蒙關係,啱啱生完,我情緒好波動。明明未生前有好多人呵護,點知一夜之間,所有 attention都去晒 BB度,冇人理我。 BB喺醫院成晚喊,都係得我照顧佢,喺側邊嘅爸爸係照瞓!
「個個新手媽咪面對 BB,咩都唔知,其實好茫然!但我都要擺出咩都知嘅樣,就算心入面好緊張,都要表現得好有自信,唔會俾人知我唔識點湊個 B。」抑鬱仲要愛面子,情緒更激動,幸好湊 BB逐漸上手,慢慢識得自我調節。
「六個月後我同 BB已經有晒 connection,佢一喊我就知佢要咩,所有人都搞唔掂我都處理到。」 Coco仲話自己絕對唔係怪獸媽咪之輩。
「我唔想太早 send佢去外國讀書,一來唔捨得,二來想佢學好中文先,認清自己嘅根,做人先會有自信。囡囡同我一樣好鍾意大自然,已經當晒家中養的貓狗係屋企人,仲成日拎住本非洲動物書唔放。依家最想等佢大啲,識少少照顧自己,就帶佢去非洲睇動物,我真係好期待見到佢嗰刻嘅表情!」


後記
 


Coco Chiang深藍色外套$2,500藍色綴黑白幾何圖案連身裙$799粉藍色手袋$499黑色拉鏈短靴$1,500all Marks& Spencer 

向來覺得,兩個人能夠一起走過逾十個年頭,仲要另一半係出名大男人嘅潮州人,唔容易。
「我老公都幾潮州人㗎,佢成日話點解次次嗌交都係佢講對唔住,跟住我就會答佢『我咁靚女、溫柔、唔亂使錢,又識煮飯,你仲想點?』佢就冇聲出,哈。其實兩個人一齊, argue一定有,重要是接受對方壞習慣,唔好成日哦佢,都唔好 expect佢會改。(笑)」
一講到老公, Coco瞬間由人母變回熱戀中的少女,個樣 sweet到呢。

 

Marks& Spencer 中環皇后大道中 28號中滙大廈  2921 8323


撰文: Bel Chow
形象: Felix Wong
攝影: Parry Fung
化妝: Chris Chan@Summer Shell
髮型: Roy Yan@Queen's Private i
鳴謝: Marks& Spencer

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()