fuck1.jpg

滾熱辣

虎媽郭可盈谷女入名校 返兩間幼稚園

Ads by Google

望子成龍理所當然,近年大勢所趨,唔少父母谷小朋友成為全能資優兒,個個化身「怪獸父母」,孩子壓力大到不堪。
本刊收到消息,郭可盈與林文龍的愛女林天若(津津)今年四歲半讀 K2,每天卻要分上、下晝返兩間九龍塘名牌幼稚園。囡囡每日踩足 8粒鐘,只為順利搏到名小入場券。郭可盈更替女兒報了近十項興趣班,務求打造阿女十項全能。如此緊張,累了父母,亦戥小朋友辛苦。

下晝 1點半至 4點半  St.Catherine's幼稚園

一家三口 12點半抵達九龍仔業主會食飯, 45分鐘後,阿女便匆匆換上另一套校服,趕去同區的 St.Catherine's返學。只得四歲半人仔,返學時間分分鐘長過大人。

 

林文龍與郭可盈拍拖 9年後結婚至今,二人已共度十九載,雖然期間男方緋聞不絕,偶有偷食傳聞,但隨愛女林天若(乳名津津)出世,亦開始修心養性,專心賺奶粉錢。可盈則淡出幕前,主力湊女,兩夫婦分工合作。

朝早 9點-12點 基督堂幼稚園

郭可盈和林文龍的囡囡林天若,每朝準時九點返九龍塘名幼基督堂讀 K2,直至 12點才由爸媽湊去食飯。

3歲考獲初級鋼琴

家底厚的可盈自小便得到父母愛錫,人到 40才初為人母,自然對女兒份外緊張。為令女兒成為十項全能資優生,據知在女兒兩歲時,已替她報讀每年學費近 10萬的京斯敦國際幼稚園名牌學前班,又安排她學花式溜冰、英文班、唱歌、畫畫、跳舞及彈琴等, 3歲人仔已考獲初級鋼琴證書。郭可盈曾說:「學多啲唔同方面嘅嘢,先知佢對邊樣最有興趣。」
為求贏在起跑線,令女兒在一年後順利考入心儀的名牌小學,郭可盈更安排 4歲女兒同時入讀兩間幼稚園,上晝返九龍塘基督堂幼稚園( CCKG),下晝就要女兒「趕下場」入讀 ST.Catherine's國際英文幼稚園。
知情人透露:「可盈個人好 strong,屋企嘅嘢佢幾乎話晒事,讀兩間幼稚園都係佢意思,反正佢覺得津津唔返學,都係喺屋企睇電視同玩。其實津津依家放學返屋企要即刻做功課,做完休息半個鐘,就要練琴練畫畫,睇見都辛苦。」

電話不離手

記者連日所見,郭可盈明顯比林文龍較緊張囡囡,連行步路都望實阿女,相反行在前面的林文龍,卻一直專注篤電話。

名小搖籃

郭可盈真識揀,其囡囡入讀的兩所幼稚園均為名牌學府,名人、明星如 Eason及陳慧琳都爭住幫子女入讀,難怪可盈死攬唔放。
CCKG只設 K2及 K3課程,每年均吸引逾千人龍排隊攞 form,但僅取錄 84名學生。如此多人報名,有說是由於大部分的畢業生,均能成功入讀男、女拔小學。當年 Eason的女兒康堤便順利考入女拔。


 

而 ST.Catherine's則是另一出名幼稚園, Kelly的兩個囝囝便先後入讀。 K2學費每年逾 5萬,雖然貴,但年中不少人爭崩頭報讀,據稱去年便要 15人爭 1學位。

食飯唔夠一個鐘


對於谷阿女日讀兩校,周一( 29日)等湊放學的林文龍多次強調「阿女開心就得!」,相反郭可盈則一直沒有出聲。 

上周四( 25日),接近中午 12時,不用開工的林文龍做司機,駕着七人車載住可盈及外傭到基督堂幼稚園湊女放學。由於放學繁忙時間冇位泊車,故只得可盈及外傭入學校接女兒放學。已返學 3個鐘的津津看上去精靈活潑,未見疲態,還邊行邊同媽咪分享學校情況,十分 sweet。其後他們急急驅車,到附近劍橋道九龍仔業主會食午飯。約 45分鐘後,可盈與外傭拖着已換上另一套校服的津津急急上車,再到同區的 ST.Catherine's國際幼稚園上課。現場所見,匆匆「趕下場」的津津,已漸露疲態,沿途一直扁扁嘴。

滾水淥腳

周一當日,郭可盈夫婦依時 12點接阿女出外食 lunch,可是遇上塞車食晏咗,搞到阿女返 St.Catherine's時險些遲到,最後母女更要跑往學校。


頻撲險遲到

周一( 29日),林文龍夫婦依舊依時親自駕車去湊女,當日交通十分擠塞,他們食晏後返 ST.Catherine's爭一分鐘便遲到,十分驚險。當記者上前做訪問,被問到囡囡返兩間學校後,二人十分避忌,可盈急急衝上車扣安全帶充耳不聞,林文龍則隔住車窗說:「個女開心就得,鍾意就得,其他嘢唔講喇!(係咪安排咗好多課外活動俾佢?)都係正常嘢!」便絕塵而去。
在香港的畸型教育制度下,時下唔少家長都抱着「大包圍」式心態為子女裝備,使他們在小一面試可以脫穎而出。可是,壓力愈大,反抗愈大,最後導致子女失去學習興趣。為人父母,真係要停一停,諗一諗!

十項全能

天若三歲時,有指林文龍和郭可盈已安排近十樣興趣班給女兒,小小年紀更已考獲鋼琴初級證書,又學埋花式溜冰(上圖),為入名校谷到盡。


拒做怪獸

教導子女,有人緊張大師上身,但亦有人只希望子女有個快樂童年,各師各法。

姚嘉妮:唔想佢哋有壓力

「我身邊有 friend嘅小朋友係讀兩間學校,不過自己喺外國讀書長大,都想兩個小朋友喺冇乜功課冇壓力嘅環境成長,亦唔會迫佢哋上大量興趣班,反而着重佢哋多啲 play time。」

楊思琦:想囡囡愉快學習

「最重要係令小朋友有興趣返學,所以我希望囡囡喺冇乜 workload下愉快學習。至於返兩間幼稚園,咁可能小朋友本身鍾意返學、同小朋友玩呢?我覺得要睇番小朋友能力得唔得,如果得就冇問題。」


撰文:娛樂組
攝影:攝影組

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()