face.jpg


本身係煙民嘅黃浩然,休息少兼壓力大,終於捱唔住患上免疫力失調。 

封面

染激罕怪病急入院 黃浩然器官潰爛

Ads by Google

藝人表面風光,接個騷就話幾萬蚊落袋,難怪個個爭住入行。
搏足 17年,喺大台一年拍 5劇嘅黃浩然,由大銀幕拍到劇集,見佢平時身型 keep到六腹肌未離開過,點知佢原來得個殼。日前黃浩然爆出患上極罕有的貝賽特氏症,據知呢種病的主要病徵為口腔潰瘍,但嚴重起上嚟會令生殖部位都潰瘍。黃浩然更因突染怪病,而辭演新劇《張保仔》,情況令人擔心。老公急入院,老婆憂心湊仔,週一( 15日)黃妻 KaKa向本刊報平安:「佢𠵱家好番好多,食得嘢、飲得嘢……」

Ads by Google

剛踏入 39歲的黃浩然,出道 17年,由《新紮師妹》劍雄殺到入大台,由一年接 2套劇做大茄,到近年擔正一年 5套,日踩夜踩幾乎連覺都冇得瞓,但係鐵打都死!


老公入廠休養,黃太擔憂之餘,負責湊 3歲大仔 Kayden返幼稚園,可謂身心俱疲。 

黃浩然 07年轉投 TVB後獲力捧, 10年更奪得「飛躍進步男藝員」。 

眼朦喉嚨爛

據知黃浩然患的貝賽特氏症,會導致血管發炎兼身體多處潰爛,大多發生在 20至 40歲的壯年人身上,好在週一( 15日)其老婆莫家嘉( KaKa)接受本刊訪問時表示,親證老公已有好轉,「佢好番好多喇,已經可以食嘢、飲嘢、講嘢。(個病會令到生殖器官都潰瘍㗎喎!)佢淨係喉嚨潰爛同埋眼朦咋!(係咪工作壓力大所以病呀?)應該唔會喇!」
本刊連日觀察,自黃浩然住院後,屋企大小事情都由老婆莫家嘉負責,連日都獨自帶大仔 Kayden返幼稚園的她,晨早 8點多出門,中午則折返接囝囝,家中還有 1歲的 Ransley,少了老公分擔家務,獨力撐住都咪話唔辛苦。

辭演

原本喺新戲《張保仔》做男一嘅黃浩然,因突然患上「貝賽特氏症」而要辭演,開工一日終於頂唔順,角色由洪永城(小圖)頂上。

死頂

今年 4月先同黎耀祥、陳國邦等人拍《商戰》,之後冇乜唞過又要預備拍《張保仔》,據知拍《商戰》期間,黃浩然已有喉嚨痛情況,但他堅持死頂。

22年 37人中招

貝賽特氏症在港十分罕見,在 1978年至 2000年間,只有 37名成年人中招及接受治療,而風濕病內科專科張德昌醫生表示:「貝賽特氏症又叫白菜病,其實係自我免疫系統攻擊自己器官,呢個病喺中國北方、日本、韓國經常出現,失調引起嘅疾病,病徵包括口腔或者下體潰瘍及皮膚結節性紅斑,但 3種病徵唔一定出現,最有可能隻眼會出現虹膜炎,日本、韓國有唔少年輕人失明都因為呢個原因,如果情況唔嚴重,經過藥物治療係可以完全康復,而呢個病係絕對不會傳染。」


網上圖片 

網上圖片 

張德昌

老友好關心

黎耀祥:我早一個星期有 WhatsApp問候佢,但佢都係早兩日至覆,咁佢都係話無事叫我哋唔好擔心。(生殖器官會潰爛?)唔奇嘅,身體其他地方都可以出現問題㗎嘛,不過佢應該好快無事嘅!

 

蕭正楠:都好擔心佢,同埋我都係睇報導先知!不過佢出晒名 fit嘅,應該好快無事嘅!佢要快啲好番呀,《大太監 2》要開,等住 5兄弟繼續拍住上架!

 

曹永廉:佢都有覆我話我知無乜事,叫我唔使擔心,不過都盡量唔去騷擾佢老婆或者屋企人。之前拍《商戰》都唔覺佢有嘢,又唔見特別易攰吖!應該好快好得番㗎喇!

男一都唔做

黃浩然 07年加入大台,第二套劇《兩妻時代》已經做男二, 09年的《碧血鹽梟》更令他人氣急升, 10年開始已劇接劇不離手,為大台搏到盡,到頭來卻捱出病來。
據知早在月前黃浩然拍攝《商戰》期間,身體已出現不適,偶爾坐立不安,有時又有喉嚨痛,至上月黃浩然仍堅持為新劇《張保仔》試造型準備開工,可是到第一天外景開工時,黃浩然終於頂唔住出聲向監製辭演,由於此劇急住開工,故臨急找來因兩大高層曾勵珍和余詠珊內鬥,原已放入雪櫃的洪永城執二攤頂上。劇本調動,陳展鵬立即升格男一,而洪永城亦順手執個男二。本來對《張》劇好大寄望嘅黃浩然,如今被迫辭演,更要在醫院靜養 3星期,唞好先再捱過囉!


今年 5月,黃浩然帶埋老婆同兩個囝囝行街買衫,當時仲鬼咁生猛! 

黃太 KaKa嘉嘉週一( 15日)接大仔放學,對於仍留院的老公病情唔肯多講,但就透露現時已有好轉,食得講得。 

今年為大台影年曆要剝衫晒肌,當時仍未有病的黃浩然精神同身形都 fit爆。《蘋果日報》圖片

今年 7月在微博自 po帶仔仔去畫畫後,就再冇新照上載。網上圖片 

黃浩然 05年同形象指導莫家嘉結婚,兩人拍《新紮師妹》時認識,拍拖 4年後結婚。老婆外家擁有半億物業,外父莫英儒更係馬主,相當富貴。《蘋果日報》圖片 

謝絕探訪

黃浩然 97年出道,十幾年來拍過唔少角色,其中有俾人打到豬頭咁,又試過被閹剪走「小浩然」,仲死過好多鑊添,就嚟拍得住羅樂林一日死 5次!

'02《新紮師妹》打到痴線

警員「劍雄」為咗保護楊千嬅嘅臥底身份,被迫扮賤男而多次被吳彥祖手下毒打,最後被人打到痴線,要見心理醫生!

'09《碧血鹽梟》病好都死


電視畫面 

「二少」胡亭軒非常慘情,先患上糖尿病,醫番好後以為一天光晒,點知最後都要被大奸人屠應龍殺死,真係該死唔使病!

'12《大太監》直接切 J


電視畫面 

「姚雙喜」因家貧入宮做太監,後來做咗御藥房總管,更同公主陳茵媺相戀。黃浩然患怪病下體有機會潰爛,心諗寧願切 J冇咁煩!

'11《我的如意狼君》死唔斷氣


電視畫面 

「佟本善」被姚子羚捅中要害,但竟然可以由天光跑到天黑再跑到天光,更離奇地唔搵醫生唔搵女友,無啦啦跑去僻靜碼頭等死!

'13《師父明白了》墓前老死


電視畫面 

上一世係梁山伯嘅「初一箭」,於第 20集坐喺黃翠如飾演嘅「歡喜」(當然上一世係祝英台啦!)墳前老死,仲化埋蝶添!

'14《大藥坊》死完翻生


電視畫面 

中毒死嘅「莊繼祖」,出場冇耐就玩完,不過大台嘅男主角就梗係擁有不死身㗎啦,黃浩然好快會以孿生細佬「莊繼宗」身份回歸!

大台做死人

大台近年小生花旦不斷流失,稍為有少少名氣嘅都要 1年拍幾套劇,俾人搾乾搾淨捱到病,最慘人工奀到冇朋友,難怪個個約滿都爭住走囉!

楊怡 歪下巴


《壹週刊》圖片 

10年拍《真相》時,因之前連踩四部劇冇得休息,令下巴神經受細菌感染,以致肌肉硬化,出現大細眼同下巴向右歪情況。

陳敏之 斷鎖骨


《壹週刊》圖片 

10年拍《公主嫁到》因頭飾過重整傷頸椎,拍《怒火街頭》跌斷左邊鎖骨,後來又患上腎炎,要入院長唞。

陳法拉 面癱


《蘋果日報》圖片 

11年突然辭演 40集重頭劇《名媛望族》的法拉,聲稱因長期拍劇導致頸背勞損,左邊面經常麻痺,要急返美國醫治。

鍾嘉欣 濕疹上面

11年要拍劇又要出碟,嘉欣密密做冇停手,休息唔夠又大壓力,以致免疫系統出現問題,濕疹生到上面。

鄧萃雯 抑鬱症


《忽然 1周》圖片 

12年《金枝欲孽貳》長期以「飛紙仔」形式拍攝,收視又唔掂,令雯女壓力爆煲患上抑鬱症,要推劇專心養病。


採訪、撰文:娛樂組
攝影:娛樂突發組

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()