me.jpg


Jennifer Tse深藍色 Make Your Own Sunshine tee$980黑藍併色皮褸$5,380酒紅色中腰皮裙$2,680all KOOKAI金色頸鏈及耳環both Jennifer's own金色戒指及粗手鈪all stylist's own 

cover face

謝婷婷 寵愛

Ads by Google

謝婷婷一向是謝家的代言人,由爸爸的女友到 Lucas的去向,事無大小都要上身,自小練得一身好武功——隨時隨地保護證人組 mode長着。
心想今次訪問,肯定給她帶着我遊上好幾個維園。
結果,原來有機會讓她做回自己嘅代言人,即時會 switch咗去暢所欲言 mode;由細細個代霆鋒頂罪,到長大後跟哥哥生疏了,到對姪仔的冧招及對小動物的痛錫,她都有如開籠雀般自動波發言,所以說,做自己,係唔同啲。


Profile
 

Jennifer Tse
出生日期: 1982年 9月 7日(處女座)
出生地:香港
身高: 5呎 4吋
體重: 108磅 語言:廣東話、英語及法語。
學歷:加拿大英屬哥倫比亞大學心理學學士畢業
簡歷: 4歲時,隨家人移民加拿大溫哥華。
05年,大學畢業回港。
08年,入行當模特兒。
11年,簽約王晶,正式當上藝人。
主要作品:《李小龍》( 10),《猛鬼愛情故事》( 11),《絕色武器》( 12),《瘋子遊天下》( 13)。
Instagram ID: jennifertsetingting


寵物達人
 


Jennifer Tse深綠色針織上衣$2,280黑色幾何圖案絲質短裙$1,280both KOOKAI黑色猄皮短靴 Jennifer's own戒指 stylist's own 

跟謝婷婷傾偈,最好的開場白,我覺得非動物莫屬。自小患有鼻敏感,但都因為愛小動物,咁大個女以來共養過三隻貓和兩隻狗;近年投身愛護動物及保護自然生態行列,定期捐錢給有關組織不特止,更身體力行年初遠赴非洲拍攝野生動物,為剛開始巡迴各地的慈善相集籌款,推動大家愛護自然生態。
「我細細個就好鍾意小動物,鍾意到唔識分佢係人定狗,食雪糕我一啖佢一啖,但媽咪因衞生問題,一直唔俾我養,直至 14歲跟阿姨住,先養人生第一頭約瑟犬。」
那早陣子狗狗「未雪」誤闖港鐵路軌遭輾斃一事,她的看法又如何?
「發生呢件事時我唔喺香港,但我有聽聞,讀書時心理學一科有個叫 bystander effect(旁觀者效應)的理論,簡單地講,係大家都以為有人會幫,結果係個個都冇幫;同時我又諗起約三星期前,澳洲有個男人攝住咗隻腳喺地鐵月台及車廂之間,結果幾個車廂的人同時下車,齊心將列車向外推,最終幫這人成功脫險。
「我唔知港鐵一事嘅細節,只可以講,最緊要都係盡番自己責任。兩個月前我新養咗隻倉鼠,我會帶佢去一啲有細路仔嘅朋友屋企,俾小朋友從小有機會接觸小動物,從而懂得愛護佢哋嘅重要性。
「另一件親身經歷,就是首次目睹生命喺我眼前流逝。約一個月前我喺銅鑼灣發現一隻重傷嘅雀仔,當時佢亂飛撞向巴士,我立即叫巴士司機停車,用外套包住佢去睇獸醫,結果醫生話佢肺部嚴重受損,建議打針安樂死,在無計可施下,我惟有陪佢走最後一程。要我強裝鎮定兼見證生命嘅終結,真係好難受,慶幸有位男途人喺出事時,早已致電愛護動物協會兼一直同我一齊陪住隻雀仔,證明香港其實有好多人,心地都好好。」


愛童真
 

謝婷婷出晒名鍾意小朋友,最瘋狂會做啲乜?
「我會『跟蹤』小朋友,留意佢哋同媽咪嘅交流,其實我主修心理學,主要原因係我好鍾意同小朋友相處,想了解佢哋多啲。」
姪仔們做過最冧的事?
「最深刻有次好耐冇見 Lucas,佢一見到我就一支箭咁跑嚟,好大力咁攬住我叫姑姐,雖然佢未必明白姑姐係咩意思,但小朋友嘅動作和行為,係最真誠最可愛。」
張栢芝成日帶佢兩個仔周圍飛,如果謝婷婷將來有小朋友,不知又會否想佢哋安穩啲留港升學呢?
「其實每個地方的教育都有一定水準,但我反而認為,生活空間更加重要,如果有草坡同較大地方俾佢哋成長係好好嘅事,有長假可帶小朋友去多幾個地方見識多啲。一個人讀幾多書都好,未見識過世界,只可從書本中認識不同國家,始終係差啲啲㗎!」
讀萬卷書不如行萬里路,以謝婷婷如此冰雪聰明,豈會不曉?


狄波拉在婷婷口中是一位嚴母,惡還惡,做女兒的深知媽媽是好愛錫她兩兄妹。 

霆鋒喺《十二道鋒味》中親自下廚給爸爸試手勢,婷婷則和他到馬爾代夫潛水,一家人雖然少見面,但感情好得很。 

兩兄妹出道多年,上月尾才首次同台,婷婷緊張霆鋒看到她表演,另邊廂她做訪問時,霆鋒又在後面𥄫實,兄妹情,盡在不言中。


兄妹情
 


Jennifer Tse黑色兔毛併灰色針織連身裙$2,380 KOOKAI黑色猄皮併啡色尖頭長靴Jennifer's own 

講起家人,又點少得哥哥謝霆鋒。
「人人都覺得霆鋒好 cool,其實佢細個唔係咁㗎,佢大個先咁 cool。早排摷番我哋細個啲錄像,有個 uncle送咗對拳套俾我哋玩,霆鋒當時好慢動作咁作狀打我,但我就起勢咁打番佢,從呢點睇得出其實佢好錫我。
「大個咗少咗接觸,之前我講過試
過 7年來只見過 7次面,已去到唔熟嘅地步,近年好番啲,因我會主動搵佢,但佢唔係 good listener,佢只有謝霆鋒的處事方法,佢俾我嘅 advice唔係常人可以做到。
「(哥哥會唔會 send短訊關心你?)吓,冇喎!可能半年無啦啦會 send一句『 how are you?』咁囉,其實佢已經 cool到冇得再 cool。」
聽聞狄波拉這位媽咪好嚴,「細個媽咪真係好惡,動不動都會打同鬧,(唔聽話,冇完成她要求?)唔會,一定唔會,就係咁都要惡,總之我哋犯錯要打 100下,佢會俾我同霆鋒商量想一次過打晒,定分兩日執行,有次完全唔知霆鋒錯乜,但又要被打 100下,結果我為他分擔咗 50下,(用咩打你哋?)麻雀尺,痛㗎,就算唔係好痛,都喊定先啦!」


後記
 


Jennifer Tse藍併綠織花上衣$1,280深藍色牛仔褸$1,480酒紅色百摺裙$1,680all KOOKAI黑色猄皮短靴 Jennifer's own金色頸鏈 stylist's own 

謝婷婷不斷話謝霆鋒愛扮 cool,關係又曾經疏離,言語間卻很緊張她這位 cool哥。
早排兩兄妹首次被邀同台,做哥哥的,從未見過妹妹行騷,她緊張得不斷問工作人員霆鋒到未、坐喺邊,知悉他只是 on the way,繃緊的面容立即鬆一鬆。之後一齊上台時,謝婷婷本想來個擁抱,又驚破壞他一向 cool爆形象,最終兩兄妹只是握手了事。
見微知著,謝婷婷對哥哥有多敬畏和愛護,盡在不言中。

 

KOOKAI
金鐘太古廣場 122號鋪 2722 9659


撰文: Carmen Chan
形象: Karen Ling
攝影: Ray Siu
化妝: Ling Chan@ZING the Makeup School
髮型: Heibie Mok@Hair Culture
鳴謝: KOOKAI

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()