me.jpg


Fala Chen紅色透視格冷織連身裙$23,399 Simone Rocha from I.T紅色高踭鞋 stylist's own 

cover face

陳法拉 戰鬥格

Ads by Google

2013年,陳法拉,「厚多士」。
《衝上雲霄 II》人氣衝上頂點,卻毅然離開 TVB木人巷,更戲劇性傳出跟 Neway大公子突然分手,頓時人財兩空,都咪話唔徬徨。
你以為啫!陳法拉向來目標為本,當然自有打算。
立心轉戰電影圈,《奇幻夜》之後,戲接戲,最新力作有《神秘寶藏》,拍住票房保證鄭中基同黃子華齊發功。
冇咗大樹遮蔭,當然要瞓身演出,負頸傷拍打戲,在所不計。
事業找到新方向,接咩 job自己話事,躊躇滿志,「我有好多新 plan!」一副戰鬥格。舊生活? No way!
「依家唔會再好似以前咁連踩十幾廿個鐘,妝都冇時間落瞓得一陣,又話起身拍!
「拍咁多電視劇未必係好事,知道個拍攝模式同演法,其實已經足夠。」
一副參透演戲真諦口吻,狀態冇得再好,「論工作態度,我夠膽俾自己 A。」擲地有聲!
有自信,始終都係好事。


Profile
 

陳法拉 Fala Chen
出生日期: 1982年 2月 24日(雙魚座)
出生城市:四川成都
身高: 5呎 7吋
體重: 103磅
三圍: 34-24-34
語言:普通話、四川話、廣東話、英語及日語。
學歷:美國 Emory University商學院工商管理學士
簡歷: 1997年,移民美國。 02年,參選全美亞裔小姐,獲得冠軍。 05年,參選國際華裔小姐,獲得亞軍。
07年,憑《舞動全城》贏得最佳女配角。
11年,再憑《巾幗梟雄之義海豪情》奪最佳女配角獎。
代表作品:電視劇《溏心風暴》( 06),《蒲松齡》( 10),《潛行狙擊》( 11),《東西宮略》( 12),《衝上雲霄 II》( 13)。
電影《 Laughing Gor之變節》( 09),《 72家租客》( 10),《我愛 HK開心萬歲》( 11),《奇幻夜》( 13)。
Twitter: http://twitter.com/falachenfala 


05年法拉在華姐競選時的三點式泳衣照,睇怕依家都好難再睇到。 

13年離巢進軍大銀幕,當然要瞓身,《奇幻夜》中跟林家棟埋身肉搏,大膽踩線! 

14年新戲《神秘寶藏》有大量打戲,法拉堅持親身上陣,周身傷也在所不計,夠專業。微博圖片


出拳都要有戲
 


Fala Chen墨綠色綴彩色珠片格色丁連身裙$59,000 Dior 

話說,法拉早前於內地拍《神秘寶藏》,練武搏到盡,頸部舊患復發,嚴重到要立刻返港做物理治療。女神受傷,唔擔心就假!
「嗰時食完止痛藥就返去繼續拍,坐低起身都要好似老人家咁慢慢嚟,劇組好好改咗啲動作就我,依家好返了!」齋聽都難捱,會唔會從此驚咗動作戲?
「冇得驚!驚就代表你仲未入戲,只係一個喺片場行行企企嘅 artist!」咁嚴重?!有意轉戲路做打女?
「我都唔知咩叫『戲路』!我最想冇『路』!冇話係咪打女,動作戲都講求內心戲,出拳都要有戲先得!
「我對自己要求不嬲幾高!」法拉出名認真,話明唔鍾意爆肚。
「最怕去到現場先度招,自己唔熟悉,好易出事㗎嘛!我實躁底!」但常聽聞 Ronald、子華兩位笑匠愛爆肚?「大家都好認真做嘢!喜劇並唔係即興,都要跟劇本,笑位都係先度好。子華搞棟篤笑都要寫稿練好多次先表演,演得太刻意誇張,就係做 show,大家都話我不經意時最好笑。
「今次拍古裝,要講台山話,一放飯休息就同子華夾口音,都幾得意。
「以前做嘢成日對住同一批人,我鍾意依家跟不同人合作,見識更多。」
在 TVB八年來工作都有人安排,突然空白,會唔會唔慣?法拉一聽,挺直腰板,淡淡傲氣。
「其實離開已成年,習慣了,工作都係咁做,影響唔大。」不過講到尾都係自負盈虧,工作當然要落多兩錢肉緊,就算戲中要「犧牲色相」,搽到烏卒卒演女海盜,頂住 40度高溫下暴曬也毫無怨言。之不過,海上陽光最毒喎?法拉一臉得意。
「嗱,真係曬到連眼都睜唔大㗎,好多人都變咗嚿炭,不過我例外!高度數防曬唔少得,就算跟對手試打戲時我都擔住把遮㗎!晚晚返去仲要狂敷補濕 mask同護膚品,先可以白住返嚟。」為 keep靚樣,真係有血有汗!


唔好讀咁多書
 


Fala Chen灰及綠色珠片圖案併羽毛連身裙$124,000 Valentino 

老實,《衝上雲霄 II》去年真係好紅,法拉作為第一女主角,人氣與事業攀上高峰,此刻離場,咁反高潮?
「過咗 30歲,發覺身體唔同咗,唔可以再好似以前咁,幾日唔瞓覺去拍劇,係時候要變; give同時都要識 take,依家生活節奏慢番少少,多咗時間休息同進修,俾空間自己吸收養份。自己又可以揀鍾意嘅 project做,自由度更大,唔錯。」咁又係,前面仲有大把世界,唔 keep好副偈點得!由公仔箱跳入大銀幕,事業更上層樓,滿意自己表現嗎?
「好難講!有時你主觀以為演得好好、好過癮啦,但出到嚟又未必啱效果,感覺可以係零分跌到落谷底;但下一場戲,又會覺得有一百零一分,嗰下真係好正!」法拉話當中障礙,原來係因為自己讀得太多書!
「演員最怕俾固定模式框住,我就係成日習慣性要去搵所謂啱嘅答案!從小學到大學,所有嘢都有個 right answer,教你要拎 100分先叫好。實則演技是一種藝術,人人審美觀不同,根本唔會有一個準則,唔係話你呢句喊幾多滴眼淚出嚟就等於好戲。我真心覺得,想做好演員,真係唔好讀咁多書同受咁多教育!
「有個老師同我講過,當你以為自己演得好,就係出事之時,所以我對自己 always in doubt!
「不過咁,講工作態度講心態,我暫時都可以俾個 A自己。」事業起飛,她的心,愈來愈雄。
「其實我依家都寫緊劇本。」想撈埋幕後?「不嬲都有興趣,平時拍戲都會留意機位點擺。我覺得一個好演員一定要識囉,要明白導演點諗嘢,識編劇,對演戲有幫助。」會轉型做導演?「呢個世界冇一定,有機會咪試,依家先以演員為目標。」


機會喺邊我喺邊
 


Fala Chen彩色繡花併布西裝褸$8,690 3.1 Phillip Lim粉紅色塑膠閃石頸鏈$6,600 Ek Thongprasert金色露肩連身裙$7,900 Tibiboth from Harvey Nichols白色印花鏡面 platform高踭鞋$10,000 Dior 

三歲定八十,法拉 14歲,移居美國亞特蘭大,細細個已慣了獨立,諸事不求人。
「由細到大父母都俾我好多自由,我唔黐家,大學都係住 hall!選美後,覺得香港搵到食,就決定留在這裡發展。
「工作機會喺邊,我咪喺邊。」
冇親人在身邊,想家嗎?
「平時都係用 Skype傾偈,我係獨女,前幾年工作太忙,一年先可能見佢哋一兩次,其實我好有歉意。
「 Daddy明年退休,想 plan啲 trip俾佢同媽咪去玩。家庭與事業,要 balance得好,好難。
「今次《神秘寶藏》要去內地拍攝,媽媽也有跟着來,一到埗,就去超市買砂煲煲湯我飲,我話唔使啦,佢堅持幫我 settle好晒所有事,搞掂第二日就飛返美國。無論你幾歲,照顧得自己幾好,父母依然當你係細路仔。」她伸一伸脷,一臉窩心。
「事業、親情與愛情,我覺得可以並存,最緊要識 balance。」講起愛情,跟薛家大少薛世恆的婚姻疑幻似真,結過又離的謎底冇人知,但回復單身已是不爭的事實。
「依家冇對象、冇拍拖!我事業心重。」
三十有二,真係唔心急?
「有憧憬但唔心急。就算結咗婚,我都唔會唔做嘢,事業係我嘅興趣,愛你就唔會叫你放棄自己鍾意嘅嘢,都唔 make sense啦!」
唔恨做少奶奶?「現階段我未諗清楚想唔想組織家庭,依家我養隻貓都好吃力,出埠工作都好唔捨得佢,何況係小朋友?!我接受唔到俾工人湊。」


Fala's tips
 


OlAy Total Effects多元修護霜$179.9 

Q:轉季特別乾燥,點保濕?
A:我鍾意邊浸浴邊按摩臉部,之後再搽 7合 1的 OlAy多元修護霜,就最吸收,配合約 5-10分鐘由下而上畫圈圈的按摩手法,最後輕拍臉頰約 30下,皮膚就會變得又亮又水潤。


後記
 


Fala Chen黑及銀色珠片連身裙$19,900 alice+ olivia黑色網紗手套$1,790 Givenchy by Riccardo Tisci 

入行九年,演過無數角色,法拉話依家最想挑戰嘅,就係悲劇人物,原因是,「我好少坎坷經歷!覺得悲劇戲味重,可以俾我過足戲癮!」咁又係,由 05年選華姐開始,演藝事業雖不是一鳴驚人,但絕對稱得上一帆風順,短短四年,已當上女一號,進佔無綫花旦行列,再進軍大銀幕;就算情路帶點崎嶇,仲後生,怕乜!


Shop List
 

3.1 Phillip Lim中環國際金融中心 2083號鋪 2805 0688
alice+ olivia中環國際金融中心 3078B號鋪 2234 7253
Dior中環置地廣場 G40-45號鋪 2524 8277
Givenchy尖沙咀海港城海洋中心 142號鋪 2735 2361
Harvey Nichols金鐘太古廣場 2樓 3968 2668
I.T銅鑼灣京士頓街 2-4號地庫 2881 6102
OlAy屈臣氏及萬寧 800 969 688
Valentino中環國際金融中心 2070號鋪 2234 7193


撰文: Bel Chow
形象: Carmen Chan
攝影: Kenji Leung  
化妝: Mon Cheng@Annie G.Chan
髮型: Alex So@P.O.P Eight

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()