me.jpg


Annie Liu粉紅色鴛鴦 Ajersey料連身裙$17,000 Versace 

cover face

我係波士 劉心悠

Ads by Google

最近潮流興講「沒女」,意指冇樣冇身材冇學識兼冇錢的「 N無女」,眼前的劉心悠,天生公主命,絕對是反面教材。
一出道即擔正做女主角,被譽為「氣質美女」的她,入行九年,星途順風順水緋聞卻淡如水……形容劉心悠,除了靚女,還是靚女。
毋怪乎心悠要劃清界線,明言「靚女係假象」。為尋求突破,今年自組經理人公司,升格做波士,當家作主。有靚女唔做,走去做打女搞到自己周身傷。「依家學緊功夫,未來想試更多肢體表演,打人又好,俾人打都唔怕!」說來振振有詞,一副女強人模樣。
事業起飛,感情卻交白卷,心悠自認對愛情好悲觀,未準備好登上戀愛列車云云。
計我話,靚女有本錢,生活不求人,大把世界,梗係慢慢揀啦!

Profile

劉心悠
原名:劉凡平
出生日期: 1981年 4月 1日(白羊座)
出生地:台北縣永和市
身高: 5呎 4吋
體重: 99磅
語言:廣東話、普通話及英語。
學歷:加拿大溫哥華 Emily Carr University of Art and Design產品設計系二年級
簡歷: 04年,回台旅行接拍台灣中華航空公司廣告入行。翌年,參加《阿嫂》試鏡,於過千名參加者之中脫穎而出,正式成為演員。
主要作品:電影《阿嫂》( 05),《出埃及記》( 07),《軍雞》( 08),《愛到底》( 09),《天生愛情狂》( 12),《盂蘭神功》、《 Delete愛人》( 14);電視劇《幸福的味道》、《幸福的抉擇》( 08),《步步驚心》( 11),《唐宮燕》( 13),《步步驚情》( 14)。
個人網站: http://www.filmkoholdings.com 

目標係吳奇隆


Annie Liu粉綠色喱士綴釘珠長袖連身裙$124,000 Valentino黑色高踭鞋 stylist's own 

訪問未開始,第一件事,心悠遞上一張新卡片,一睇, CEO新銜頭,我連聲恭喜,再打趣叫聲「劉老闆」。心悠一聽,喜上眉梢。
「嘻嘻,其實我主要職責係派卡片,得個名㗎咋!」
自立門戶唔容易,何解咁大決心博一博?
「我見到工作上充滿商機,一直想創業。咁啱前排跟前公司合約到期,同前老闆傾開,估唔到佢都支持我,順理成章就開始了。」演員兼老闆雙重身份,她直言又驚又興奮,好矛盾咁話!
「我唔係一個特別叻嘅人,但我覺得一個聰明嘅 CEO,要識知人善任,以各人的能力分工。我唔鍾意管人,老闆唔係皇帝,咁樣好大壓力,會死㗎!」藝人身份傾生意好有着數?
「未享受到這方面的好處喎!其實自己主要負責台前演出,其他有合夥人一齊去經營。老闆都係喺個框框內做嘢,只不過大啲啫!
「之前拍《步步驚心》時,都有向吳奇隆取經,同樣自組公司的他,係好成功嘅例子,生意愈搞愈大。你唔會估到佢拍戲當係放假!無法想像他平時生意究竟有幾忙同有幾煩,佢係我學習對象!」問及未來大計,同很多藝人一樣,事業北望神州。
「依家公司只係兩個月大嘅 BB,但我見到佢潛力好大,都開始同內地公司傾緊一啲 project。」一輪嘴講生意,愈講愈興奮,仲話唔係女強人上身!

一步一腳印

席間,這位新進劉波士,不斷強調自己對做生意冇野心,最想打好的,終究是演員這份工。
「呢行我投資咗九年,稱得上一步一腳印,唔敢講自己好好戲,但對所有事,都盡心盡力去做。」
有外表當然唔等於冇演技,但心悠靚女形象太入屋,她也大呻戲路往往因此被定型。
「斯文外表其實都係假象!即如我跑馬拉松,有啲人見我外表似連包米都拎唔起,就話我喺度做戲,唔係事實我唔會理!藝人化妝 set頭,出嚟要靚,但反而成為一個障礙,其實都幾矛盾!
「依家我視外表係一個 bonus,如果唔係做人太辛苦。」咁睇得開,可見道行又高了。不過,心悠遇強愈強,當然唔甘心給人看扁。
「開新公司,其中一個原因係想有更多機會嘗試不同角色。我想拍武打片,打人、被打,甚至演有身體障礙嘅角色都冇問題!我好欣賞武術導演洪金寶同張晉,如果未來有機會合作就好!」
她坦言想挑戰打戲,因為自覺「肢體能力唔協調」。人哋話白羊座女生特別好勝,喜歡以實際行動來證明自己的實力。
「每次在熒幕見到自己,都覺得唔順眼,想立即轉台,總認為當時可以做得更好。」事業上,正磨拳擦掌,曾被提名金像獎最佳新演員,下一步又是否以影后為目標?
「對於一個演員來說,能夠得獎當然是最高榮譽,但我會視為一個方向而唔係目標,因為唔到你 plan,想拎就要問自己有幾努力。」


84年心悠出名孝順,細細個最愛黐實媽咪。微博圖片 

14年《盂蘭神功》為演活鬼上身,經常被威吔吊上吊落也全無怨言,夠敬業樂業。 

14年新戲《 Delete愛人》扮朱麗倩引王祖藍,夠搞笑,估唔到心悠可以咁百變。

我對愛情好灰


Annie Liu銀灰色印花塔夫綢連身裙$41,900黑色羊仔皮長靴$21,700both Lanvin 

談情說愛,從來都是女人死穴,作為緋聞絕緣體,問到感情,一樣耍手擰頭,答案一如既往:現在單身。
「我最怕別人問我感情生活,都唔知俾咩反應好。其實我性格好宅女,自己工作時間又唔穩定,忙到連屋企人嘅節日聚會都 miss晒,你話仲邊有時間拍拖?!」我笑指她事業心太重。
「都係㗎,拍咗拖,就要將時間重新分配,顧此失彼,自然影響我對事業的付出程度。不過講到尾,係我未遇上啱嘅人,撻着我呢架電單車!
「我個人對愛情好灰,唔相信會有外人可以體諒我嘅工作。唔想失望,所以唔敢隨便開始一段感情。我細細個,父母已經離婚,俾我好大陰影,令我覺得感情靠唔住。有時見到身邊朋友一對對好 sweet笑得好幸福, sorry我感受唔到。」
今年三十有三,不再是春青少艾,連家人都戥佢心急。
「阿媽仲緊張過我,話這個年紀係時候生 B,但家庭對我,好 ideal。娛樂圈呢行,本身就有好多事唔能夠用正常標準去睇,我唔覺得要結婚先可以生 B,依家有卵子冷凍技術,我唔排除會作出呢個選擇。」
睇嚟要打動這位女神一點也不易,問及擇偶條件,心悠聳聳肩,拋下一句,「要好似我咁思想簡單。」愈講愈超脫,老實,成日拍感情戲,面對男神對手,真係未試過動心?
「拍時我會全情投入,但拍畢就會將感情放低,就好似掉垃圾咁。
「如果我拍拖一定會公開,因為都係正常社交生活,冇咩值得隱瞞。」

後記


Annie Liu白色併半邊西裝棉質 tee$4,400黑色彈性料半截裙$5,500黑色綴珍珠絨帽( showpiece)all Emporio Armani 

話說拍攝當日,造型師特別預備了套 deep V設計嘅衫俾劉心悠著,點知她一看大為緊張,軟硬兼施下始肯走進更衣室試一試,但試穿期間卻不斷傳來「真係太低」同「唔得呢」的高頻率叫聲,最後我哋當然冇強人所難。
「我真係過唔到自己!如果著一件衫好似冇著咁,我會唔記得自己要做咩。」講到咁嚴重,又點捨得難為你呀!

 

Shop List
Emporio Armani 中環遮打道 11號 Armani Chater House  2532 7711
Lanvin 中環雪廠街 10號新顯利大廈地下 3號鋪  2205 0013
Valentino 中環置地廣場 103-104號鋪  2523 8035
Versace 尖沙咀海港城海洋中心 117A號鋪  2737 2628


撰文: Bel Chow
形象:黃健華
攝影: Parry Fung
化妝: Jan Chan@Annie G.ChanMake-up Centre
髮型: Eric Chow@Xenter

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()