改裝熱玩

日本全民玩車日  Motor Games 2014 in Fuji Speedway

Ads by Google

近 10年,香港慢慢發展到只有人「用車」而冇人「玩車」嘅可悲時代,所有同玩車有關嘅行業都萎縮陰乾!僅存堅持要玩嘅車迷,改裝、遊車河變到好似做賊咁偷偷摸摸!當然,呢個現象除咗因為警方努力執法,經濟走下坡、缺乏好玩平車等都係因素。不過喺日本,就算地震、海嘯、漏輻射,定經濟衰退、增軍力,人民都冇停過玩車,更加愈玩愈普及化!今年首辦嘅 Motor Games,就由大人到細路都有車鬥,由四個轆飛到兩個轆!香港人冇得玩,都應該睇吓人點玩反省吓!

 


Motor Games有近 10個活動,遍及整個富士賽車場。 

日本經濟好過香港好多咩?唔覺!但點解車迷可以長玩長有?就係因為有一大群熱心推動者!以前日本仔搞 event好封閉,最勁嘅 Super GT、最有娛樂性嘅 D1 GP觀眾係多,但只係得個睇字。不過今次喺富士賽車場搞嘅 Motor Games就唔同,兩日活動中有多個項目,咩類型嘅車迷都啱睇,重頭項目如 Formula Drift同 Offset Kings更加係首次同美國機構 crossover,細路仔鬥嘅 Runbike Challenge Series就由美國 Strider平衡單車推動,仲有非常容易入門嘅電單車賽。雖然只有 13,038人購票入場睇,但參加各個項目嘅人就有成 1,362個,唔只可以參觀,仲可以參與,完全將玩車融入生活!

 

 


Motor Games活動遍及成個賽車場,所以有巴士接入場人士去各項活動舉行地點。 

賽道看台位都坐滿人,但唔及 D1 GP迫到落下面草地咁墟冚。 

比賽間場時間大會安排咗 HKS同 Top Fuel改到 1,000匹嘅 GT-R做 time attack,不過濕地冇試到盡。

除咗賽車場餐廳之外,仲有大量小食攤位,牛肉串燒 700日圓(約$54)一串。 

中央廣場有 95間公司擺攤位,最受歡迎係賣易手零件嘅 Upgarage,仲新開咗英文網頁畀人海外訂購。 

因為引入咗好多鬼佬賽事,外國傳媒同觀眾多過 D1 GP多多聲。

美國鬥到返日本  Formula Drift Japan


Racing Girl選舉唔少得,但因贊助商唔夠 D1 GP多,囡囡唔夠 10個。 

係人都知飄移源於日本,早喺 99年已經有 D1 GP正式比賽,仲 hit到去美國,鬼佬都係 04年先跟風搞 Formula Drift美國比賽。不過美國佬搞嘢勝在夠國際化, 05年開始搞到去澳洲、新加坡、泰國、馬來西亞、印尼同阿聯酋,今年仲勁到踩返日本作為 Motor Games活動嘅重頭賽事!其實 Formula Drift喺富士賽車場搞嘅同時, D1 GP都喺中部空港搞咗個表演賽,仲請到 Ken Block落場同㗎仔火併!不過始終都只係一個 show,點都唔及 Formula Drift可以畀咁多人參與,因為門檻夠低同公開,參賽者超過 140個咁誇!除日本之外,仲有美國、澳洲、紐西蘭、新加坡、泰國、馬來西亞、印尼,甚至中國同香港車手參與。賣門票係冇 D1 GP咁多,但有咁多車手報名費收,分分鐘好賺過 D1 GP!

 

 


由 RS. R贊助嘅挪威車手 Fredric Aasbo係 Formula Drift嘅明星車手,主力鬥美國賽事,係今次比賽中最勁嘅外國車手。

全場最矚目戰車就係 Fredric Aasbo揸嘅 RS. R NASCAR V8 86,用到 TRD為美國 NASCAR賽車 Camry開發嘅 750匹 5.7公升 V8,引擎聲的確係全場最爆! 

美國比賽嚟日本搞都係用番講英文嘅 Formula Drift御用評判,喺日本做開評判嘅織戶學(左)同谷口信輝只係做日文解說。

強國車手自由行


兩個國內車手都有帶埋老婆,甚至仔女、阿媽嚟日本打氣,鬥完排排坐睇 replay。 

香港旅遊業最成功係引入自由行佔領香港,好嘢點可以唔益埋日本仔?所以之前去過馬來西亞鬥 Formula Drift又去過日本鬥 D1 GP嘅香港飄移代表 James,今次唔只自己去,仲帶埋兩個國內車手劉卓同劉舜祺首次出國比賽!簽證、賽車證、運車、食宿全部安排妥當,賽前一星期更帶埋佢哋去福島惠比壽賽車場進行特訓,服務好過香港自由行領隊一萬倍!難道收咗好多「導遊費」? James:「唔好當國內車手傻啦!大家都鬥開車,大會收費又公開嘅,樣樣嘢明碼實價,你點收多人錢呀!整個行程都係大家傾出嚟嘅,錢就大家都要使。其實佢兩個都跟開我飄移,想帶多啲國內車手放眼世界,咁先可以令中國嘅飄移水平提高。否則次次比賽頭三甲都係我,冇競爭就唔會有進步㗎喇!」

James

試車時乾地,但比賽時就落雨,我哋頭幾架出車,完全唔知條路乾定濕同水氹位喺邊。用咗乾地 setting點知賽道啲水流到好似條河咁,我都唔小心甩過龍掉咗頭!所以話比賽一半係實力、一半係運氣。


劉卓

今次嚟日本比賽真係大開眼界,日本車手去到邊個場都可以好快搵到條 racing line點行,而且次次都可以做到同樣嘅動作,同國內車手水平差好遠!不過超過 200km/h飄移始終係第一次,過到第一個彎,第二、三個彎就承接唔到。


劉舜祺

近年國內飄移嘅氛圍愈來愈熱,我哋可以作為第一批出國比賽嘅飄移車手真係學到好多嘢,希望將來多啲車手出國見識,咁先推動到中國飄移運動。去上海鬥一場車都要 4、 5萬,嚟日本比賽都係十零萬,其實物有所值。


230km/h甩尾輸天氣

位於富士山腳嘅富士賽車場離港人熟悉嘅御殿場 Premium Outlets只係 20分鐘車程,係日本最具代表性嘅賽道之一, F1都喺度鬥過,出晒名夠高速! D1 GP亦一直有喺度鬥甩尾,今次比賽嘅部分亦相近,由 T5甩到去 T7彎,頭一個落斜 T5彎飄移速度超過 200km/h! James:「平時香港同國內比賽嘅場地,頂盡都係 4波 180km/h甩入去,但呢度就第一次試用 5波入彎甩到 210km/h!要好有決心同手車好定先做到,而且有啲日本車手撞埋牆賠咗 4萬幾蚊呀!」
好在 James同兩位國內車手星期五試車時,練咗兩、三次都可以做到 5波過 200km/h入彎。不過今次比賽係由 140個車手選出 64個先有資格落場,個個都唔係流料,加上星期六初賽一時大雨、一時冇雨,出賽前又冇熱身圈, 3個車手都習慣唔到而表現失準,全部 0分收場,連 32強都入唔到……


起點喺 T4彎前直路,去到 T4彎部部戰車都上到 6波,拖落 5波盡油入呢個 T5彎,車速已經超過 200km/h,高手仲可以去到 230km/h! 

冠軍戰係由改到 600匹嘅 D-Max S15(右)鬥 800匹嘅 RE雨宮三轉子 RX-7, D-Max S15只係追走時唔夠角度而輸。 

橫井昌志(左)只係鬥開平民級嘅 D1 Street Legal,同 07年已經喺富士贏 D1 GP冠軍嘅末永正雄差幾班,輸係應該嘅。

勝負冇乜人關心

因為同期有 D1 GP,所以最 top嘅日本車手都冇參加 Formula Drift。而且唔係 James輸咗瀨落雨,因為贏過 D1 GP年度冠軍嘅日本車手齊藤太吾、 Red Bull御用紐西蘭車手 Mad Mike、泰國歌星車手 Auttapon Prakopkon等紅人都入唔到星期日嘅 16強決賽,所以除咗車手本身,根本冇乜人再關心邊個會贏。最終由老牌 D1 GP日本車手末永正雄揸 RE雨宮 RX-7贏冠軍,亞軍就係揸 D-MAX S15嘅二線日本車手橫井昌志,而遠道而來、揸住部全場最矚目 700匹 RS. R NASCAR V8 86嘅挪威車手 Fredric Aasbo只係得第三。
事實上,今次 Formula Drift喺日本搞,亦真係唔夠 D1 GP咁多 gimmick,完賽之後冇畀觀眾落賽道同戰車合照,頒獎亦好求其,氣氛遠不及 D1 GP高漲,所以 8成觀眾一睇完總決賽就即閃都可以理解。不過喺日本搞 Formula Drift又真係可以振興旅遊業,因為現場所見嘅外國觀眾多過 D1 GP成倍,就連採訪嘅記者都特別多國藉,的確更加國際化!

網址: http://www.formulad.jp/ 


除 RS. R 86外,全場最吸引嘅仲有齊藤太吾部改到 1,200匹嘅 Lexus IS350C開篷版,可惜都係入唔到 16強。 

全國飛雞、 7仔集會


嚟集會嘅 7仔同飛雞只收 3,000日圓(約$230),數量仲多過改裝車展,咩改法都有,若然係 fans,畀 2,000日圓(約$150)入場費齋睇呢 600部車都值回票價。 

日本站 Formula Drift係唔夠 D1 GP吸引,不過佢其實只係 Motor Games活動嘅其中一 part,入場人士並唔一定係為咗睇甩尾賽。因為大會同時喺富士賽車場嘅 P2停車場搞咗 Mazda Festa同 Silvia& 180SX Meeting,全日本改得最出位嘅 7仔同飛雞都嚟晒集會交流,參加車輛多達 600架!最正係可以畀錢即時落 short course飛番轉當 track day咁玩!

 

 


場中當然有專改飛雞同 7仔嘅改裝公司擺攤位,大會仲整埋限量版 tee,賣 2,500日圓(約$192)。 

富士賽車場中有 4個小賽車場,嚟集會嘅車唔使預約,即場畀 4,000日圓(約$308)就可以去短道飛 15分鐘。 

落場飛嘅 9成都唔係玩甩尾,只係好似 track day咁鬥快,但亦唔係揸得好盡,所以有部 MX-5玩到掉頭都冇意外。

觀眾有 Say 搞親比賽都嚟睇!

小川先生同水戶小姐住喺富士吉田市,雖然唔係熱血車迷,但就帶埋兩隻著晒賽車衫嘅狗仔入場。「我哋揸車嚟賽車場只係半個鐘,嚟賽車場有賽車睇又有攤位行,所以富士賽車場搞親比賽都嚟睇。而且 Motor Games入場費都係 2,000日圓(約$150),平過其他大賽又多啲嘢睇。」

潮牌激改美國風  Offset Kings 2014


全場最激係呢部 bB,車身嗰層假生銹「批盪」勁像真,仲玩埋單紅眼、釘釘鐵線鬼面罩、十幾粒彩色軨螺絲同一打向上飛尾喉,喪屍 feel濃重! 

玩車唔係個個都愛激飛,玩樣都係主流!所以 Motor Games活動中仲有 Offset Kings呢個節目,而且同 Formula Drift一樣,都係首次由美國引入日本,又吸引咗超過 300架車嚟擺 show。不過同一般車展唔同,畀 9,500日圓(約$731)入場擺 show嘅大部分都唔係鋪頭嚟兜生意,而係個人參加,目的只係 show吓自己部車改到幾咁有型同交流吓。
至於咩係 Offset Kings呢?簡單講即係 low down部車貼晒地、又改到 camber勁斜、四隻軨八字腳插晒出嚟嘅玩法。其實呢種 style日本仔已經玩咗 40年以上,但傳到去美國又將成件事包裝到潮晒!由於美國街頭潮服名牌 Fatlace主理人勁愛日本改裝文化,一向都同好多車廠同改裝公司 crossover出特別版, 08年開始仲喺美國搞埋 FTLC甩尾比賽兼 Offset Kings車展,更將日本呢種改裝方式命名為「 HellaFlush」,即時令呢種玩法變成一種潮流文化!現場所見,啲車除咗全部都改到貼地同八字腳,仲部部都有主題,改法有中心思想、甚至藝術成分,同香港人改乜我跟你改乜嘅奴性玩法,真係天堂同地獄!

網址: fatlace.com/lacedup/offsetkings/

 

 


喺看台後嘅大廣場擺咗超過 300部改到古靈精怪嘅車,共通點係全部 low到貼地同八字腳。 

呢部 Soarer同 RX-7噴晒粉色唔特別,但前面擺晒攤位支持萌系 AV女優櫻木郁就勁襯! 

揸 AE86仲扮《頭文字 D》戰車 look out晒喇!好似呢架咁裝頂架擺單車、滑板就潮番晒啦!

1968-83年生產嘅極罕 VW Type 181軍車係人都 keep原裝,但日本竟然有人咁玩法! 

呢部 1974年第 3代 Corolla旅行車外表就玩鬼佬 big hit嘅生銹車身,但內裡就換咗 Altezza副風杯直索 Beams引擎! 

成個場都係 180SX,但得呢部玩美國 Drag Race直路賽仕樣,引擎艙剩係得副偈,其他乜都拆晒!但連水箱都冇點行? 

呢部 Mazda3雖然舊款,但大包圍勁之外,仲玩「痛車」,貼晒 ACG動漫拉花,再加車主帶埋女僕朋友嚟,雖然樣麻麻,但勝在有心機襯到絕! 

參展有 Say 成家一齊嚟文化交流!

來自橫濱嘅岸本太太同前田太太嘅老公係朋友,大家都揸 VIP系改裝 MPV,老公們行晒去睇車,兩個太太就湊住仔女喺攤位。「老公放假經常都會帶埋我哋同仔女去車會活動,每部車都好有個性,除咗換現成嘅配件,大家都會 DIY啲自己鐘意嘅小物上車,見到人哋部車就可以更加了解人哋嘅性格,當然會成家一齊嚟文化交流。」

兩個轆 X-Game技擊  FMX x Supermotox走攻祭

講技術,玩兩個轆可以比玩四個轆飄移有過之而無不及,達到玩命程度! Motor Games當然會照顧埋電單車迷,其中最激嘅就係圖中嘅 FMX( Freestyle MotoCross)花式電單車賽,雖然今次唔係比賽、只係表演,但 4個冠軍車手輪流揸爬雞衝上斜台,飛上 4樓咁高嘅 15m凌空做花式,直頭係挑戰死神!
不過玩電單車唔一定要咁癲, Motor Games入面仲有兩個講求技術又易入門啲嘅電單車賽,其中 East 1 Supermoto就可以話係兩個轆嘅飄移賽,用既有爬雞越野能力又有街車操控感嘅新興 Supermoto車種,喺超多彎同夾雜 on/off road嘅賽道激走,用甩尾方式過彎,仲會有斜台飛 jump位!好在均速其實都係幾十 km/h,唔算好危險。不過玩 Supermoto都需要使唔少錢改裝,所以 Motor Game仲喺 Gymkhana Course搞咗個玩得更平嘅「走攻祭」扭樽賽事,咩車種都玩得,個個瞓彎瞓到貼晒地,追求最流暢嘅過彎技術。雖然戰車唔使點改裝,但個個都會勁玩 outlook。最值得欣賞嘅係 Supermoto同走攻祭嘅車手都冇乜贊助,大部分人都係自己一腳踢運車、整車、鬥車,成本低之餘,呢種玩嘢玩得咁深入嘅樂趣,更加係玩乜都畀錢人解決問題嘅香港車迷一世都享受唔到嘅!

 

 


Supermoto車種用高扭力單缸引擎,車身窄但座姿低,而且用細軨配街胎易做花式。 

一圈只有 820m,但就 set到有十幾廿隻急彎,過彎想快要甩住去,仲會有 offroad路段。 

比賽車種由 50c.c.起分 8組,最細嘅 MiniZ都改得超認真,鈦金屬 kit喉、揹樽避震齊晒!

走攻祭唔使鬥錢多改裝,但個個車手都鐘意搶收視, DIY貓耳頭盔同戰車拉花係必然。 

嚟扭樽嘅車主都係自己揸貨 van或 MPV載戰車同架生嚟,全部識整車、換胎。 

個個車手都試瞓彎極限,所以成日都有人跌車,但速度低到 20km/h以下唔會太傷。 

雖然走攻祭係計時賽,但街車、啡呤,甚至綿羊、 mini bike等都會一齊玩,因為快慢唔係重點,過彎做得靚一樣博到人喝采,挑戰自己技術先係滿足感泉源! 

車手有 Say 同老公一齊落場飛!

雖然好多走攻祭車手個樣都好似暴走族咁,但其實大部分都好 nice,更加有唔少女車手!住喺伊豆嘅朝比奈小姐就帶埋兩個女嚟鬥車。「後生時成日坐老公車尾,自己都慢慢鐘意電單車。橫掂佢鬥車我哋成家都會嚟,所以兩年前開始就同老公一齊落場飛,用嘅錢唔多,又可以 keep fit。所以走攻祭一年兩次大聚會都會成家人嚟,同老公輪流落場、湊女。」

BB專業飛單車  Runbike Challenge

好多日本人都對改車、賽車好狂熱,究竟點解會咁?今次喺富士賽車場內嘅 kart仔場就搵到答案,原來係因為佢哋由學行開始已經鬥車!講緊嘅係 Motor Games中嘅 RCS( Runbike Challenge Series)平衡單車大賽,估唔到日本由 2012年開始竟然有系列賽畀低至 2歲嘅 BB鬥!用美國 Strider平衡單車 one-made race,分 2至 5歲及以上共 5個組別,啲 BB會騎住部車一面跑、一面滑行鬥快衝過終點!仲好似正規賽車咁,一年鬥 6站,計總分攞冠軍。
現場所見有過百細路參加,無論家長定細路都真係好認真咁去鬥車,啲 BB都會分晒車隊,比賽時搭晒帳篷做 pit,啲「車手」賽前會靜低思考,賽後輸咗又會飲泣。而且仲有好多牌子專出 racing parts畀 Strider用,輕量化 handle bar、鵝頸、輕軨、安全 seat乜都有,仲 pro.到分乾胎同水胎!其中最 hit嘅牌子就係個名好搞笑嘅 Daddylab,擺明係做啲將賽車願意投射落個仔度嘅老豆生意。筆者唔敢講佢哋係咪好似香港嘅怪獸家長咁恐怖,但從小可以教小朋友專注去玩一樣嘢,而唔係驚蝕底咩都學少少,相信已經令個 BB獲益良多。

網址: http://www.rcs2013.com/ 

 

 


每轉比賽有 12個細路落場,起跑位用 60cm圍欄頂住前轆,個個都大力推前準備彈出。 

雖然賽道只係得幾十米長,但要兜幾個大彎鬥快,幾歲人仔去到尾段真係筋疲力盡㗎! 

終點欄會有 1-12位置,到達嘅細路唔會博大霧爭位入,會依次序埋位記錄成績。

鬥平衡單車一樣有 pit,而且分晒車隊,有齊整車架生。 

熱完身等比賽,車手會好似大人咁搵個地方靜落嚟思考! 

9成家長都係揸 MPV嚟,車尾塞滿後備單車、零件同胎軨。 

紅色雪糕筒係賽道,綠色雪糕筒就係熱身試車區,你睇個 BB濕地雙腳都離晒地咁劈彎! 

家長有 Say 玩都要玩得認真啲!

比賽當日不停落大雨,但過百家長同車手仍然處之泰然,完全唔擔心小朋友安危。嚟自東京嘅今野太太同內藤太太:「小朋友戴好晒頭盔、護甲,炒車都唔會有大問題,就算有少少擦傷都係應該要面對嘅,希望教到佢哋玩都要玩得認真啲,從小開始適應遇到挫折應該點解決,長大先會堅強。」


撰文、攝影:陳致新

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()