梁志祥承認當日有反佔中簽名運動,不過死都唔認有搞荔枝團。插圖:詹震寰 

八卦陣

去荔枝團變反佔中義工

Ads by Google

啱啱過去嘅星期日,保皇黨地區組織搞咗個費用全免嘅深圳荔枝團。不過,蛇齋餅糉通常好睇唔好食,食完背脊骨落,唔少街坊出發後先知中伏,荔枝團無端端變咗反佔中義工團成立典禮。
呢個荔枝團參加者高達二千人,以公公婆婆為主,要分幾十架旅遊巴北上。話說旅遊巴去到深圳過關後,工作人員辯稱天氣太熱,為免長者曬親,臨時改去深圳仙湖植物園行個圈。工作人員順手落藥,話一陣有反佔中簽名活動;一日遊完結後,每人有一盒荔枝做手信。

 


梁志祥(黃箭嘴示)致辭時乘機向長者洗腦,指佔中令社會治安唔好。(陳先生提供圖片) 

長者們睇完風景食飽飯,下晝到達羅湖體育館,先知原來係一個「元朗義工團成立典禮」,台上有廿多名嘉賓,包括深圳嘅官員,致辭嘅新界社團聯會立法會議員梁志祥不斷向長者洗腦,話香港治安唔好,激進分子搞破壞,影響經濟,強調要響應周融嘅反佔中簽名活動,希望成立義工團。其中一名「被義工」嘅陳生覺得件事好離譜,「直頭係賣豬仔!咁樣用小便宜去呃基層市民支持,好厭惡!」
記者向義工團主席梁志祥查詢,佢先知周融個簽名行動未正式開始,唯有辯稱平時都有搞反佔中活動。佢仲話見班街坊成日困喺元朗,不如去深圳旅行,順便搞個義工典禮,除咗喺香港嘅車馬費外,其餘使費都係由深圳政府負責,仲強調一直冇同街坊講係荔枝團喎。

周融表現差 保皇黨幫拖


周融(中)上星期三同施榮懷(左)以及吳秋北,宣布本月底展開反佔中簽名運動。不過周融講極都講唔到點解政改公投七十八萬人投票就有水分,佢預期簽名反佔中人數有八十萬人就冇水分囉。(《蘋果日報》圖片) 

所謂反佔中簽名運動,其實係「幫港出聲」召集人周融牽頭嘅「保普選、反佔中大聯盟」活動,一方面佢話佔中政改公投投票人數有水分,另一方面又揚言將收集八十萬個簽名,表達「和平理性」反佔中嘅聲音。
聯盟以三大商會和勞工界多個團體組成,好明顯係拉雜成軍。工業總會主席劉展灝、鄉議局主席劉皇發、工聯會會長林淑儀僅以個人身份出任組織發起人,鄉議局及工聯會仲未加入。據聞,「幫港」成立後表現差強人意,加上保皇黨老一輩眼見佔中聲勢浩大,北京急急發動愛國愛黨力量「戙支旗」出嚟,搞到部分組織未開始傾呢壇嘢,被迫「人到會未到」。
不過,親共第一大黨民建聯似乎唔多俾面,除咗無參與聯署,亦只得一位知名度低嘅副主席陳勇加入聯盟。據了解,民記擔心反佔中「跟車太貼」,可能影響區議會同立法會選舉部署,所以閃得就閃,寧願自己搞而唔埋堆。

黃毓民事先張揚的被捕


毓民寧願主動走入差館,都唔俾記者影到佢俾人拉。(羅國輝攝) 

黃毓民上星期四喺特首答問大會掟爛玻璃杯,俾 689借題發揮,側側膊唔使回應幾十萬人投票同遊行表達嘅真普選訴求,激到班泛民議員同毓民劃清界線。
689執到塊玻璃碎片當係寶,特首辦小題大做立即報警。星期五晚,政圈不斷傳出警察會拘捕毓民嘅消息,七點幾已經有傳媒機構收到料,八點幾毓民創立嘅「普羅政治學苑」仲透過 facebook公布毓民被拘捕,但過咗十分鐘就刪除咗。
邊個傳出呢啲消息不得而知,但明顯空穴來風,因為當晚大班記者守候毓民嘅時候,已經發現有架疑似坐住便衣警察嘅私家車停喺立法會外面,俾記者問兩句就走人,轉個頭就見到呢幾個便衣喺中區警署「迎接」毓民。
毓民叫埋律師十點去到立法會接佢,仲搵埋黃洋達到場陪佢一齊去中區警署。警署外,毓民人未到都已經有三、四十人插晒旗撐場。拉人同被拉兩方睇落都係準備充足,睇嚟甚有默契。係咪有人向其他人通水,由讀者自己判斷。

黃洋達七一笠水


熱血公民午夜曾經喺德輔道中逗留,之後黃洋達(紅箭嘴示)話去遮打道聲援學生,點知天未光就唔見影。(鄭樹清攝) 

七一遊行後,學聯凌晨十二點開始佔領遮打道。一班熱血公民成員本來喺滙豐總行對出嘅德輔道中留守,黃洋達後來呼籲佢哋轉到遮打道聲援學聯。雖然佢哋真係過咗去遮打道,但只係一陣咁大把,大概凌晨兩點,清一色黃色衫嘅「熱狗」慢慢散去,再過多一陣連黃洋達都唔見咗人。
其實,相比「教主」黃毓民,黃洋達都算留得耐。有心水清嘅網民發現,毓民七一繼續「講波抗共」,遊行之後返咗去會合「低俗講波團」,主持埋世界盃最後一日嘅十六強賽事。
佔中後援會嘅快必就留到天光,警方想喺遮打道嘅另一邊進駐,快必都有幫手阻擋。不過當警方完全封鎖咗馬路之後,佢即刻閃咗,周圍問阿 sir:「我想離開,點樣可以行過去地鐵站?」最後都無同留守嘅示威者捱到八點清場行動結束。

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()