Venus(右)跟 Kaman都刻意擯了個辮子髮型向古烈治致敬。 

今期流行

古烈治教 M妹踢波

本週四世界盃開戰,有商場請八、九十年代紅遍全球的荷蘭球員古烈治來港做宣傳。唔知佢係邊位?提起佢個 trademark dreadlock髮型跟二撇雞,你一定記得。早年轉做領隊的古烈治換了 skin head,剃埋鬚,身形無大走樣,怎看都不似五十二歲。
男人老狗做體育版訪問,古烈治本人都嫌悶催收工,忽然見到我哋安排嘅《 M Club》少女版李麗珍王敏奕,同師妹江嘉敏嚟踢波,這位一代名宿即刻生猛晒,更扮鬼扮馬跟兩個𡃁妹擺搞笑甫士;而有幸得古烈治教波的王敏奕就開心話:「我同朋友(估計是她的男友、曾志偉個仔曾國祥)講會同古烈治一齊影相,佢話真係古烈治定古明華呀?」

Ads by Google

三人猜波

未開波,商場公關已通水,說古烈治嫌早上做的三個訪問悶到爆,希望這個訪問都早開早收。貴為八七年的歐洲足球先生,及八九年的世界足球先生,當然想他表演球技,古烈治用腳同心口控幾次波當交功課,好彩後來有《 M Club》王敏奕( Venus)同師妹江嘉敏( Kaman)加入,三個人猜波拍照,古烈治才愈踢愈開心, Venus好識做話:「佢攞足球先生我都未出世,不過我嚟之前都睇定晒佢啲資料。」咦!果然有備而來喎!
面對兩個𡃁妹,古烈治只係輕輕一傳, Venus都搞唔掂,「西」咗個波出場,「我唔夠膽掂個波,唔知點解掂親,個波就飛去另一邊,但佢只要腳上有波,就好似由大腦控制住。」師妹 Kaman就因為能連續控球,氹得古烈治好開心,對方更失驚無神問她有無拍拖?搞到 Kaman唔知點答。
玩還玩,做得兩個女仔爹哋有餘嘅古烈治,都語重心長咁告誡兩位妹妹仔運動的好處,「你知自己的身形不會直到永遠,而且 team sport令你學會互相尊重,以前我都有跟唔啱的隊員合作,但要尊重對方,放低自我,因為他是我的組員,大家是球隊的重要資產。」


轉了 skin head的古烈治實在不易認。 

古烈治教 Venus虎尾腳。 

古烈治人到中年童心未泯,跟 Kaman一齊做足球寶貝,齊齊擺心形甫士。

剪髮換形象

身為「荷蘭三劍俠」之一,與雲巴士頓、列卡特齊名的古烈治,當紅時在 AC米蘭效力,後來轉戰英國車路士,更帶領球隊贏得九七年的英格蘭足總盃。但香港人最深刻,應該是他像地拖的 dreadlock長髮。這個跟了他十五年以上的 signature,就在千禧年跟其足球事業一併結束,「我頭髮質地似羊毛,初時只要扭扭吓就成咗個髮型,根本無用髮型師設計,二千年我不再是球星,唔需要被人認出,就好似睇書,睇完了,我個髮型一樣要完;剪完髮,又真係無被人認出,我可掂行掂過。」
退役後轉做紐卡素、荷蘭飛燕諾、甚至碧咸有份踢的美國洛杉磯銀河的教練,最後一次是三年前到俄羅斯的格羅茲尼執教,但每每因球隊無獎攞或跟球隊發生爭執被炒魷。目前客串當足球評論員,古烈治坦言想做教練領隊多過做講波佬,「以前是球員,梗係仲想接觸我愛的運動。」但他好醒,唔肯講想教邊隊,「只要我講一個名,隨之而來會有一連串的批評。」


本週日,古烈治跟楊思琦現身商場騷,然後返回荷蘭,翌日再飛巴西睇開幕戰。 

由廿一、二歲開始玩 dreadlock髮,長短都試過,其實會影響他跑步時的視力嗎?「唔會,一早習慣晒。」 

撰文︰鄭子瑩
攝影︰葉志明、李敏軒
化妝︰( Carman) MM Tang@Portfolio、( Venus) Bowie@Fifth Salon 
髮型︰( Carmen) Thomas Kwan@Portfolio、( Venus) One Tung Ma
場地︰ apm

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()