她被封半百美魔女,「傳媒好好,俾個封號我」,每次出席公眾場合必以最佳狀態示人。「有半年時間我匿喺被竇喊通宵,後來我同自己講,為咗 3個仔,要企番起身。」離婚後她自信跌到零,全靠父母不離不棄,「佢哋話:『食粥食飯以後都喺埋一齊,唔使擔心!』屋企人係避風港,我要俾啲仔知道,無論發生咩事,我會成為佢哋嘅後盾。」 

熱到爆

來自星星的媽

Ads by Google

外星人都敏俊能對千頌伊死心塌地,但「媽媽」這種生物,大概能超越時間、空間限制,因為幾千年來,每個媽媽都想把最好的留給子女。身兼明星身份的媽媽比一般母親更難做,長期活在鎂光燈下,子女私生活都成為報道焦點。
今次找來一班來自星星的媽媽,分享與子女的甜酸苦辣。

單親虎媽 羅霖


細仔 Johnathan最黐媽咪,年紀細細已追看韓劇《來自星星的你》,上星期金秀賢來港她更帶細仔追星,又為拉近與兒子關係,下載 K-pop歌曲及電視劇。 

49歲的羅霖前年跟劉坤銘離婚後, 8歲細仔跟她, 18歲大仔及 16歲二仔跟前夫。她要自食其力,接拍了陶傑做導演的情慾片《愛.尋.迷》,肉搏關楚耀。
「我事前花很多時間與兒子解釋電影內容,話媽咪依家要自力更生,好需要呢份工。」
影片播出後,三個兒子,反應各異。
「大仔較識分辨,但二仔不肯接受,講了很多好 hurt的說話。我知佢依家係反叛期,俾啲時間佢。」少不更事的細仔最支持她。「他想睇我演出,但未夠年齡無得睇。大仔二仔想睇亦唔會阻止,不過他們對外語片的興趣較大。」

好「虎」

她坦言,婚姻破裂其中一個主因,是彼此教仔方式不同。「我對三個仔嚴格,因為男仔將來要有承擔,要照顧老婆。但他(前夫)很寬鬆,例如我不准他們成日看電視,前夫又准,導致很多爭拗。」
她是個虎媽。小時候,三個兒子每人一個月曆表,哪日做錯事得「 X」,做得好就有「 V」。「一個月少過 3個『 X』就有禮物,禮物是$100零用,三個仔為零用會學乖。」
後來大仔二仔年紀漸長,她知道月曆獎勵已唔 work,就改為傾心事教仔。「臨瞓前跟他們分享我工作的點滴,引導他們也講下心事。」
三個兒子有不同性格,大仔外向,二仔內向,三仔最聽話。
「大仔想做明星,我和他去睇戲,見到主角掉落泥中,我就跟他說:『拍時唔止跌一次,是跌好多次!』又帶他去片場睇我拍廣告。我不反對他做明星,但要他明白明星真正的工作。他看過我拍嘢後,已經話唔再想做明星了。」


一有機會,羅霖會一拖三帶兒子去旅行,與大仔 Nathan(中),二仔 Jordan(左)及細仔 Johnathan增加溝通機會。 

內疚


羅霖 91年當選亞姐冠軍後出道, 96年嫁給富商劉坤銘後淡出,專心相夫教子,前年仍是一副幸福少奶奶樣。有傳離婚導火線是爭吵過程中前夫對她動粗,亦有指劉坤銘出現第三者,最終離婚。 

如何關懷體貼也好,離婚對小朋友始終有影響。「我好想把他們的心理負擔減到最低,每次聽到他們說好懷念以前一家人食飯嘻嘻哈哈,又問我會唔會同 Daddy好番……種種都令我好心噏。」她哽咽地說。
離婚後因撫養權問題,她對大仔及二仔就只有空擔心。「大仔考大學,英國及香港都有學校收他,我想他去英國,但未必管到。」
尤其二仔正在反叛期,對母親不瞅不睬,她歸咎前夫在兒子面前渲染,「小朋友唔知道幫邊個,但時間可以證明一切,我同佢哋講:『無論發生咩事, Daddy、 Mammy最錫係你哋。』」

最愛

她和劉坤銘曾為撫養權水火不容,現在庭外和解共同撫養。細仔生活費、雜費開支由她一力承擔。為賺錢,拍電影、廣告,出任投資移民公司總監,又籌備開醫學美容院,每日只睡 3、 4小時。
「工作後回家還要幫細仔看功課,替他默書,等他睡了我才吃飯休息。做嘢咁辛苦都係為咗佢哋,冇嘢重要得過小朋友。」
連擇偶,都以小朋友行先,「如果小朋友唔過關一定唔得,如果佢都唔錫小朋友,咁都唔係一個有愛心嘅人。」

為佢撐下去 楊思琦

媽咪唔易做,單親媽媽更難做。 35歲楊思琦 12年誕下女兒 Krystal,當日現身機場被傳媒追問女兒生父身份,思琦不回應,今日重提舊事,她說:「阿女暫時未問,到佢真係問到,我會講。」
思琦由懷孕至生女,楊母一直陪伴在旁,思琦忙於搵奶粉錢,女兒由母親照顧。「最近見到媽咪好似蒼老咗好多,自己都好心痛。佢對我個女好似自己個女咁。依家個女黐佢多過我,無論是眼瞓、肚餓、扭計,都是找婆婆。」
但兩代人的教育方式不同,雙方都要磨合。「女兒經常跳跳紮,有時媽咪會話佢,但這個階段要多啲讚,我叫媽咪改口,不要講負面的說話。」思琦笑言小朋友是心理學專家,知道誰可以被她征服:「例如她會搶公公電話,卻不敢搶我的,因公公最縱佢。」
要兼顧事業與女兒的生活開支,她直言辛苦,但女兒一走來逗她,就幾苦也值得。「瞓瞓下,佢會走嚟我牀邊叫我:『媽媽, wake up, wake up』,一開眼見到她掩住嘴笑!」
對女兒,只期望她做個好人:「認錯很重要,我做錯事會對她說:『穎穎 sorry』,她犯錯亦要說 sorry。」


思琦上月與合作 13年的 TVB解約,轉到內地發展,「我都想多啲嘢做,希望愈來愈忙啦。」 

Krystal去年一歲生日,思琦為女兒舉辦生日派對。 

思琦鮮有讓女兒曝光,唯一一次是與 Krystal參與拍攝慈善月曆。

好醜做人難 朱咪咪

「母親節?十幾年前慶祝過一次,做藝人一到大日子要做 show,今年要登台,邊有得慶祝?」
戲內,朱咪咪做八婆、無知師奶;戲外,她卻是機關算盡的媽咪,為了一對兒子,去到好盡。
朱咪咪於馬來西亞出生,新加坡長大, 70年代來香港發展,在香港結識做司機的丈夫,誕下兩名兒子,大仔健庭與細仔健晉今年分別 25及 21歲。

嚴母

為了兒子有良好讀書環境, 00年她把兒子送往新加坡定居,由丈夫照顧。「開學第一天陪兒子見副校長,他成隻眼紅晒,啲眼淚𠺘下𠺘下。我同佢講:『嗱,忍住呀,唔好流出嚟呀,俾人見到好瘀㗎!依家你可能好嬲媽媽,但以後你會多謝我。』我同大仔講,考得好才可以來港過暑假,佢真係好俾心機讀書。」
為了兒子生活,朱咪咪拍劇拍至日夜顛倒,只有自己住在香港,連工人也沒有,「我唔會行街,得閒就拖地,連牀下底都抹到好乾淨。」

慈母

朱咪咪有 9兄弟姊妹,自幼已要養家,「細個一家 11口住 80呎房仔,爸爸做飛髮,食橙開四份,一人一份,一年得一套新衫。」她體會貧窮滋味,她希望把最好的都留給兒子。
但媽媽的苦心,兒子不懂。最初她因經常拍劇未能回新加坡,跟兒子關係生疏。「有新加坡朋友話大仔對我好陌生,嗰下當頭棒喝。當時在 TVB由朝拍到晚,根本冇時間,現在只要有五、六日休息,我就飛過去。」為拉近與兒子距離,她更接拍新加坡電視劇,「試過一落機即拍七場嗌交戲,拍完我以為自己有產後抑鬱!」
她生活節儉,平日以巴士、地鐵代步,名牌手袋也沒一個。但大仔 20歲生日時,卻送他 60萬跑車,又在新加坡買了 3層高豪宅,「阿仔可以空間大些,希望將來結婚都可以一起住。」
「會唔會真係慈母多敗兒呢?」她說。


朱咪咪丈夫馬先生(中)多年來貼身照顧兒子,反而擔當八卦角色,與兒子討論女友及車最啱嘴形,三父子親如兄弟。 

朱咪咪直言只是外表予人八卦感覺,「我拍戲與現實差不多,只是我不會八卦別人的事,但會想將來的事。」大仔健庭亦視母親為學習榜樣,希望把她開心一面帶給大家。 

唔想做怪獸 朱薰

10年 10月 10日, DJ朱薰與 Mr.成員 Dash孖生弟弟譚健榮結婚,前年中懷孕。「知道消息當日是母親節,所以阿仔未出世已經慶祝。」
對朱薰而言,為人父母後的最大分別,是個頭。
「以前最喜歡染髮,依家好少染,因為一染就 6、 7個鐘,我寧願陪個仔。」
她是緊張大師,個仔跌下又驚跌親骨,嘔啖奶又話要睇醫生。
「我好有潛質做怪獸家長,要盡量勒住自己,同自己講佢跌跌下就大。」
去年初「譚嬰兒」出生,她繼續做 DJ,卻堅持不請工人,與媽咪輪流照顧 BB,「有朋友請了工人後,女兒喚她做『 Mary媽媽』。 Mary係工人個名,朋友聽到個女咁叫唔開心到爆。有工人就會依賴,換片時連 BB屁股有無紅疹都不知,亦不想錯過他成長每個細節。」
與朱薰相反,老公譚健榮非常冷靜,「我每次做決定前都會問佢,佢次次都話唔使啦。咁都好,令我唔使變怪獸。小朋友有事我哋都會商量,如小朋友做錯事,我哋要責備他,不是一個鬆一個緊,大家要一致。」
譚嬰兒出生後,朱薰跟家人關係更緊密,因為她明白父母的偉大。父親上月因病離世,「 Daddy、媽咪都有幫手照顧 BB, Daddy好錫個孫,嚟緊可以參與的儀式都會俾佢一齊參與。依家更加覺得屋企人要一齊。」她流着淚說。



朱薰笑言以為自己是嚴母,豈料兒子扭計嗲她,即刻軟化,「反而我老公會企硬,原來他才是嚴父。」 

以前媽媽用土法照顧朱薰,今日要睇書、上堂,重新適應照顧BB。「我們用了一年時間磨合,我提醒自己,媽咪幫手唔係必然,好多老人家只想玩孫,我要對她更寬容。」 

朱薰的「怪獸」一面只是表現在兒子的生活細節,反而對兒子的期望不大,「我都想他 go with the flow,大個鍾意做咩都由得佢,做考古都得㗎。」 

教仔捉心理 歐陽妙芝

名模歐陽妙芝除了打理化妝學校,大部分時間放在兩個分別 5歲和 8歲的兒子身上,每天管接管送,激心事件每日都發生。「兩個仔每一日鬧交就最煩,佢哋好 friend,但各有見解,依家除咗瞓覺日日鬧交,好似嗜好咁。有時仲專登意見不合,一個話鍾意韓國,另一個揀日本。」
日日疲勞轟炸,妙芝用心理戰打贏小兄弟。「我做和事老叫停,佢哋就不停嘴。掉轉我話『我唔理,你哋繼續啦!』咁佢哋就會停。」
小朋友跟大人一樣有情緒,懂得在適當時間釋放,生活美滿得多。「有時兩個仔加埋 Daddy, 3兄弟搞到我好勞氣,我鬧完又瞓得唔好,影響心情同皮膚。我盡量每個月同老公離開兩個仔少少時間,就算返嚟再嘈都好,起碼放鬆咗先。亦盡量安排兩個仔去旅行,佢哋心態又會好啲,可能有時放咗學好攰,困喺屋企情緒差啲。好似細佬尋日 sports day,用咗幾個鐘做運動,一完就話:『媽咪我唔想將隻腳板擺落地囉!』之後就同哥哥撩交嗌。我都明白佢攰到發忟憎,叫佢瞓陣,瞓完又真係冇事。」


兒子放假,盡量帶他們去旅行,放鬆心情。 

早前歐陽妙芝一家到台灣放天燈,細仔 Atilla希望去多幾次迪士尼,而自小學踢波的大仔 Achille就想做個球員。 

媽咪要玩得 楊婉儀


楊婉儀對兒童發展有研究,跟仔女玩益智遊戲。 

港姐冠軍楊婉儀( Winnie)下嫁王瑞勳後生了一仔一女,更考獲多個兒童發展證書。「我花好多時間同小朋友分析每件事,好多時佢哋對某啲事感覺唔開心,又唔識處理,我好 welcome佢哋講,等佢哋習慣乜都講乜都問,等大家建立良好關係。」
除了着重溝通,楊婉儀會透過遊戲同小朋友增進感情。「我哋咩都會玩,夏天喺花園玩水槍,又會玩大富翁、紋身貼紙。早幾日就喺屋企玩 star war,你射我我射你。等佢哋知媽咪原來都好玩得,唔只淨係識叫我做功課。」

從小教價值觀


女兒婷知想買手機,楊婉儀解釋給她知道沒這個需要,玩手機不如畫復活蛋。 

跟小朋友相處,唔同階段有唔同處理方法。「我囡囡 Hannah快近 9歲,依家 3年班已經好有主見,仲會留意同學仔嘅嘢。有同學仔有手提電話,囡囡又話想要一部,我同佢講依家太細個,加上身邊永遠有人陪住佢。就算有電話都只可以打 emergency call,唔可以打機同 WhatsApp,咁有乜用?不過佢堅持話要,我就解釋咩係『想要』同『需要』。最後我話到佢 12歲就買部俾佢做生日禮物,再同佢講當媽咪覺得你有需要,可能未到 12歲都會擁有, you never know!等佢明白媽咪係有得商量。」


撰文:朱嘉儀、蔡靜雯
攝影:劉玉梅、梁幹持、袁家樂 
錄像:李梓軒
部分相片提供:受訪者、互聯網
服裝: Moiselle(羅霖)、 Patrizia Pepe(楊思琦)

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()