韓國好鍾意拍真人騷,仲要搵啲知名度高嘅藝人坐鎮。 SBS新節目《 Roommate》都唔例外,但係咪有晒劇本做假,真係要播多幾集先知。 

亞熱帶

韓式同居男女

Ads by Google

節目抄嚟抄去係常識,唔需要大驚小怪。
今次 SBS製作嘅《 Roommate》,周日( 4日)
啱啱首播。睇番個節目,同 MBC《我們結婚了》
有啲似,不過就由夫妻變 11男女同居,仲極之
鼓勵屋內藝人談戀愛。講到明如果有真情侶誕生,會提供免費蜜月旅行㖭!你問係咪
做假? Well,你睇過自有定奪。不過,男女明星瞓埋一屋,幾搞嘢囉。

 

 


同類型嘅真人騷 MBC《我們結婚了》,一做就六年,真係長做長有,最新一期係「俊美夫婦」鄭俊英同鄭柔美。 

韓國人鍾意喺野外聚餐係常識,難得電視台搵咗間咁大嘅屋拍攝,喺花園食炸雞飲啤酒,正! 

李東旭 唔瞓搞事

趕劇趕到唔夠瞓嘅李東旭,拍完《 Hotel King》去到新居已經係凌晨兩點幾!雖然佢放慢腳步搬行李返房,唔想嘈到其他人,但一入房見到朋友曹世鎬,就忍唔住叫醒對方,問間房乜都冇,係咪可以就咁瞓?查實嗰陣已經係半夜囉!大明星果然唔等得。


李東旭半夜收工趕到,估唔到朴春仲夜過佢,兩個人喺門口相遇,由於唔多熟有啲尷尬。 

恃熟賣熟嘅李東旭,唔理曹世鎬瞓緊,半夜三點嗌醒對方,問呢樣問嗰樣,呢啲,咪好朋友囉! 

入到房見到只有書枱同牀嘅李東旭,係咁問:「乜都冇嘅?」睇嚟佢真係好少做綜藝,正常見到咁,瞓啦! 

李東旭呢排同《大話妹》舊拍檔李多海趕拍《 Hotel King》,依家仲玩埋真人騷,堅紅! 

2NE1朴春 麵包吞噬機

咪以為所有女星都要減肥, 2NE1嘅朴春就係例外嗰個喇!唔只隊友爆佢鍾意食麵包,佢自己喺節目入面,亦都身體力行,畫晒眼線瞓醒之後,第一件事唔係刷牙,而係好似多啦 A夢咁帶住個百寶袋,隨時拎個麵包出嚟食,好神奇!


瞓醒一開眼,朴春冇起身刷牙,而係先拎個麵包出嚟,瞓喺度食。但點解瞓醒都有眼線嘅? 

食完又食喺屋企無所事事,朴春又諗起食嘢,繼續咬麵包。 

凌晨三點先到達嘅朴春,帶埋陪瞓嘅姆明嚟,當時仲未知入屋之後,間房有狗,最後要瞓廳。

曹世鎬 全智賢勁 buy

唔好以為曹世鎬只係識搞笑,佢仲好識自我宣傳,之前上節目就自爆《星星》女神全智賢老公都係佢 fans,仲自備修葺過嘅大頭相去拍攝現場鎮宅,唔認得佢都認得張相。


如果唔講曹世鎬拍過《來自星星的你》,真係唔知佢係乜水。不過佢叻,「千頌伊」全智賢主動要求同佢合照,贏咗。 

曹世鎬雖然係搞笑藝人出身,但佢都有拍吓劇㗎,佢仲帶埋巨型宣傳相去新居,驚死冇人識佢。 

兜亂  love story

Love Line係每個節目必備,《 Roommate》就梗係唔少得啦!好似洪洙賢同徐康俊見唔夠一陣,就拉隊去超市入貨。之不過呢對姐弟就真係跟足「劇本」,一行入超市即刻繑到實。 Well,兩個都係演員出身,好戲係常識囉!


韓國興姐弟戀,洪洙賢一見到徐康俊就雙眼發光,好快就搞掂 Love Line。 

睇吓!睇吓!行咗幾步就繑住手喇!「 nuna(韓文:姐姐)」洪洙賢好進取吓!淨係睇背面,點知佢兩個相差 13年。 

返到屋企,洪洙賢又同另一弟弟朴敏雨玩得好癲,仲餵對方食果醬,其實都係節目效果囉。

仲有程咬金After School嘅 NaNa帶埋 1:1紙牌去新屋,人未到紙板人同行李先到。佢又醒喎,知道間屋有班前輩喺度,會幫佢搬行李入屋。 NaNa之後又會明撬徐康俊,搞四角戀。 

徐康俊(左)同朴敏雨(右)唔只係同房室友,仲係 Love Line嘅三角關係,但感覺上刻意咗啲。 

宋佳妍 豪邁格鬥女

比男人更打得嘅宋佳妍,連性格都好男性化。睇佢睡姿,唔只鼻鼾好響亮,仲踢被腿張開露出內褲,唔怪得名模李素拉(下面有介紹)嚟到就想瞓佢張牀,一睇就知舒服啦!


宋佳妍瞓着之後,唔只鼻鼾,仲擘開腳露晒底,唔……節目效果? 

女格鬥技選手宋佳妍唔打拳嗰陣,聽吓音樂都有文靜嘅一面,之不過瞓咗之後,就好似下圖咁。 

李素拉  Old模被杯葛


以為自己係名模又係前輩,班後輩就要睇佢面色,李素拉打錯如意算盤。拎咗十箱行李叫班星搬完之後,全世界當佢透明,真係團結嘅啫。 

韓國不嬲都敬老,只要你年紀大過我,做細嘅咪乜都要做晒!名模李素拉一搬嚟就點班男人搬佢近十箱行李,又帶埋愛犬入住,嚇親同房嘅朴春。李小姐為人麻煩,話咁快被全體杯葛,睇畫面都知,灰晒!

EXO燦烈 俾人玩


EXO嘅燦烈被曹世鎬同南昌熙玩電話,聽到對方問係咪中國食堂,燦烈仲附和答:「係!」之後自己都忍唔住笑。 

諧星曹世鎬搵埋同事南昌熙(圖右)幫手搬屋,兩個唔知係咪太無聊,竟然搞到玩電話。咁啱得 EXO嘅燦烈(圖左)一個喺屋企,就咁成為佢哋嘅目標!燦烈只好配合,被玩之後仲大笑,呢啲咪可愛囉。


撰文:張韋弘
設計:成志強

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()