非港劇讀

視帝金明民無得輸《改過遷善》

一套劇收視好唔好,有時唔只睇劇本,仲要睇有冇神一樣嘅對手。好似上星期 MBC首播嘅水木劇(逢周三、四)《改過遷善》,搵嚟拍完《電視劇之王》後休息兩年嘅金明民坐鎮,話晒佢都係「青龍獎」影帝同兩屆「百想藝術大賞」視帝,演技真係冇得輸,再加埋拍過《城市獵人》、連「男神」李敏鎬都曾經公開承認其女友身份嘅朴敏英。追,應該是常識吧!

Ads by Google

《改》劇雖然係律師戲,有唔少法律常識出現,但演知名律師嘅金明民(飾演金錫周)就唔只淨係表現嚴肅一面,同劇中律師事務所實習生朴敏英(飾演李智胤)第一場對手戲,就有唔少搞笑嘅親熱鏡頭,之後朴敏英仲着埋性感睡衣出場,大晒本錢,場面都幾香艷㗎!
點知有一日認錢唔認人嘅金錫周發生意外,俾地盤鋼筋壓中,雖然執番條命仔,但就失憶連自己係邊個都唔記得,唯一記憶就係佢嘅法律知識。之後點?劇本雖然未出,但都知會受李智胤影響,變番個有良心嘅人,顛覆佢原本嘅性格,用法律幫助窮人,同佢事務所嘅處事風格有分歧,搞到對立。當然喺呢啲被打壓嘅時間,唔少得鋪排啲 old school戲碼,李智胤嘅天真率直性格,成為金錫周嘅能量,之後咪兩個日久生情囉!論賣點絕對啱晒阿豬媽口味,劇情老土係老土咗啲, well,你唔會揀大台維穩劇、膠到不能再膠嘅《西遊記》啩?


2009年金明民憑劇集《貝多芬病毒》兩度封帝。同年上映嘅電影《我的愛在我身邊》亦橫掃「青龍電影獎」及「大鐘獎」封帝。那一年,勁威! 

朴敏英同李敏鎬合作《城市獵人》之後,真係撻着咗!仲成為「男神」唯一承認過嘅戀人,可惜唔夠一年就分手。 

金明民結婚前呃咗太太兩年,話自己唔係做演員,事關保守嘅金太對藝人有偏見㗎。

金明民同太太李景美結婚 13年,每拍完一部戲,就會一家三口去旅行,睇唔出又幾浪漫喎! 

女主角朴敏英早喺 2010年就為內衣品牌 Solb代言。又真係幾有料喎! 

第 1集:蝦碌一夜情

 


李智胤參加好友婚宴,為免婚禮被好友前度金錫周破壞,捱義氣幫忙拉走金生。點知佢混亂中飲加料汽水,斷片下帶咗金錫周返屋企過咗一晚。 


瞓醒見到金錫周喺自己屋企嘅李智胤,誤會雙方發生一夜情。為免之後有問題搵唔到人,李智胤叫金錫周寫低電話。點知返到律師樓發現金係佢上司。 

第 2集:避車出意外

 


為大商家獨子打甩女星強姦案嘅金錫周,為求勝訴,收買證人。 

食完飯返屋企嘅金錫周,一個人行行下覺得有啲唔妥,點知為避電單車跌咗落地盤,被頭頂嘅鋼筋壓中。 

第 3集:失憶搵水泡

 


大難不死嘅金錫周,喺醫院醒番,但失咗憶,唔記得自己係邊個。 

冇晒記憶嘅金錫周死纏住李智胤,希望搵番啲記憶。仲唔順理成章談埋情! 

撰文:張韋弘

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()