上樓開餐4月 28日,本刊拍得袁潔瑩和 TB助手坐車返屋企。 TB助手拎住兩盒乳鴿,袁潔瑩則攞住大碗雞粥,齊齊上樓開餐。看來有助手慰藉,試過患厭食症的袁,胃口大開。 

滾熱辣

舊愛阮嘉欣拒復合 袁潔瑩 TB助手攝位

Ads by Google

今年 44歲的袁潔瑩,情路上遇過唔少壞男人。以為同性三分親,她 05年中途轉 channel,與阮偉文胞妹阮嘉欣傳出攣攣緋聞。不過斷背情前年玩完,袁潔瑩疊埋心水靠自己,轉行開中醫美容館。
可惜事與願違,中醫館生意唔掂,結業收場。加上舊愛阮嘉欣有新戀情,令還未死心的袁潔瑩痛上加痛。事業愛情雙失,袁潔瑩只好搵身邊人訴苦。早前本刊拍得她帶埋 TB助手返屋企,直至深夜,助手都未捨得走,可見二人關係非主僕咁簡單。

 

已經淡出幕前,近日只為大台拍了一部中女劇的袁潔瑩,實際工作量不多,但她身邊卻出現了一個打扮男性化的女助手。上周一( 4月 28日),袁潔瑩到大埔為鳳凰衞視錄影完節目,便與這位 TB助手坐七人車落大圍搵食。現場所見, TB助手非常體貼,自動波落車買雞粥和乳鴿外賣,好讓袁潔瑩舒服地留在車內扯煙。


司機收工袁潔瑩落車後立即叫司機收工,看來她和 TB助手返歸後有排傾。 

袁潔瑩雖然已屬中女,但身材保持不錯,厭食症康復後,她決意豐胸。 

助手激似前度

買完外賣之後,七人車直駛袁潔瑩位於西環的寓所,二人齊齊上樓。正常情況下,助手送完藝人返屋企後便與司機齊齊放工,不過記者等候至當晚深夜,還未見 TB助手離開。
記者發現這名 TB助手除了忠心護主,外形和樣貌也有袁潔瑩舊愛阮嘉欣的影子,難怪二人十分投契。知情人士說:「 Fennie(袁潔瑩英文名)透過朋友介紹識到呢個女仔, Fennie不嬲好保護自己,但同呢個女仔好快就熟絡咗,仲叫佢辭工幫自己手。講真吖, Fennie家陣冇乜嘢做,其實又邊使請個私人助手服侍自己,所以我哋成班朋友都覺得好奇怪。」
前年,袁潔瑩和阮嘉欣七年情告終,雖然二人對外聲稱再見亦是朋友,但實情二人關係經已決裂。「 Fennie未放低阮嘉欣,諗住仲有得掹,但結果阮嘉欣分手後冇耐就火速換畫,搞到 Fennie好傷心。不過,阮嘉欣就係唔鍾意啲女人咁黐身,所以佢避得就避。 Fennie以前同阮嘉欣啲死黨上山詩鈉、甄楚倩都好 friend,不過依家連電話都冇個。」


傍實開工去年袁潔瑩返大台拍劇,身邊已經出現這位 TB助手。當時這名 TB助手幫手攞戲服,而袁就戴住白色手套煲煙。 

恩愛 5年袁潔瑩與阮嘉欣拍拖七年,二人更經常孖住出席活動,非常恩愛。《壹週刊》圖片 

怪癖扯煙4月 28日,記者亦拍得袁潔瑩坐在車內上電,而且白色手套依然存在,有潔癖兼有怪癖。 

袁潔瑩與阮嘉欣前年分手後變成陌路人,阮亦急住帶長髮新歡曝光,擺明與袁畫清界線。《壹週刊》圖片 

蝕過百萬老本

舊愛拒復合,袁潔瑩的中醫美容館原來亦秘密執笠,認真運滯。早年患有厭食症,體重徘徊七、八十磅左右的袁潔瑩,透過中醫改善體質,擊退病魔。有見及此, 2011年,她與中醫師合資共二百多萬,於灣仔開設中醫美容館,自己順手做埋生招牌,不停四出宣傳。
原本袁潔瑩希望靠中醫生意過活,淡出幕前,並滿懷信心說:「希望兩年後可以回本,到時再考慮擴充同開分店。」怎料生意一落千丈,兩年後要結業收場。記者上月中到其中醫美容館舊址睇過,發現已人去樓空。


飲酒甩騷甚少外出的袁潔瑩,周一( 5日)單拖外出,坐的士到中環買紅酒,之後就返屋企,全程唔夠一粒鐘。當晚她原定出席佛誕活動,但公關則稱她要宣傳劇集而甩底,不過記者卻發現她留守在家飲酒,認真奇怪。 

買藥補身4月 25日,記者拍得袁潔瑩現身中環,到萬寧買健康藥物。之後她急急腳搭的士返家。 

袁潔瑩:分手好痛苦


周一( 5日),記者問過袁潔瑩好友羅明珠,對於其中醫館執笠一事,羅說:「都有一段時間喇!我捧過場一次!(佢有新戀情喎?)呢啲你問番佢啦,始終係佢私人事。」 

蝕了過百萬老本,難怪對娛圈已戀無可戀的袁潔瑩也要出山拍劇。周二( 6日),記者打過電話給她,對於中醫美容館結業,她說:「做咗一年,發覺自己唔係好多貢獻,我拍檔係針灸醫生,但我唔係。之前覺得自己乜都做到,好彩我好快忍痛斬纜!」
她強調中醫館蝕錢冇影響其生活,「以前賺咗嚿錢去買樓,買完仲有錢就再買樓,自己對生活都幾滿意!唔好太苛求,天跌落嚟當被冚囉,搵多一蚊咪使多五毫囉,唔通依家咁嘅年紀,仲好似十零歲咁貪慕虛榮咩,都經歷過晒啦。」
對於與 TB助手之間的感情,她未有回應,不過卻堅持自己單身,「感情事好似我依家個人咁,休息狀態囉,都休息咗兩年嘞!唔知係咪人年紀大咗,冇咁易投入一段感情。每一次拍拖我都係諗住一生一世,但好無奈每一次都分手收場。分手好痛苦好慘,我享受拍拖嘅過程,又好怕分手嘅後果。(同阮嘉欣再見不是朋友?)都話咗唔答就唔答,因為啲前度會以為我搵佢哋宣傳。
「我當然仲希望拍拖同有人錫啦,但唔會一廂情願,仲以 16、 17歲嘅戀愛態度去處理感情。我係又愛又卻步,我依家輸唔起呀!不過如果有段緣份衝埋嚟,我個樣一定掩都掩唔住,一定會俾人知我拍緊拖。」 44歲的袁潔瑩,保養算不錯,希望可以搵到真命天子啦!

中西夾攻唔掂

2011年,袁潔瑩與中醫師投資二百多萬,於灣仔波斯富街某商業大廈開中醫美容館,更首創為客人先內服中藥調理身體,再配合一系列激光微創療程變靚。雖然有 noise,但生意谷極唔起。

 

做生招牌
袁潔瑩對中醫生意甚為着緊,經常主動約相熟傳媒到中醫館影相。

 

FB宣傳
「森原軒」中醫美容館開業初期,袁索性做埋 model之餘更開埋 facebook,講到明由自己主理來谷生意。

 

關門大吉
上月記者到過「森原軒」舊址,發現已經執笠,連門牌都冇,但袁潔瑩卻稱前中醫師拍檔繼續留守店內睇症,相當奇怪。

賣樓賺千萬

袁潔瑩現時工作量不多,靠老本過活。根據資料顯示,袁潔瑩走紅時買磚頭投資,低買高賣,賺近千萬,不過老本都有耗盡的一日,看來她要諗計搵食。

情路崎嶇

中途轉黐同性的袁潔瑩,入行後曾與不少男士傳緋聞,不過最終分手收場,難怪她怕再投入戀情。

 

徐日勤
90年代初期,袁潔瑩與音樂人徐日勤撻着,二人交往 4年後分手。當時有報道指袁潔瑩被這段情傷得最重。

 

王傑
王傑早年拍音樂特輯,搵袁潔瑩做特別嘉賓。當時有傳袁對王傑展開瘋狂追求,不過遭男方拒絕。

 

顏福偉
袁潔瑩與白花油王子顏福偉曾經頻頻結伴睇首映和夜蒲,因而傳出緋聞。


採訪、撰文:娛樂組 
攝影:攝影組

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()