拍攝這天剛巧有客人的一輛古董法拉利在美容。這款車價值可說無價,全球少於 5輛,香港就得這輛。「車主是多年的熟客,架車他連自己個仔都唔俾掂,但就喜歡拿來清潔扮靚。」客人的信任最令 Sendy感動,也是堅持下去和向前衝的動力。 

好資色

空姐轉做汽車美容 青出於「男」

雖說男女平等,但有些行業始終有男女之分。好似汽車美容,說穿了就是洗車打蠟,工作環境多污糟邋遢,亦要求體力勞動,名副其實的粗活。你永遠只聽到人嗌「洗車仔」,明顯這行以男性主導。但凡事有例外, Sendy在澳洲大專畢業,做過空姐,後來無意中入了汽車美容業,最初做顧客服務,慢慢親力親為學埋一份, 5年前自立門戶開汽車美容店,本着洗車如洗面的細緻和用心,令客人安心將過千萬的靚車讓她護理。今天她成了行內「女行尊」!

 

所用的清潔劑均可自然降解,人畜無害。大部分產品都達世界環保標準, 2010年更拿過「滙豐營商新動力獎勵計劃」的綠色成就獎。 Sendy將心愛的鸚鵡都養在店內,「鸚鵡對環境好敏感,受化學毒物刺激會中毒。我就是考慮到寶貝們的健康,所以引入各類環保無毒產品。」

 

好地地靚靚空姐點解埋咗男人堆?「空姐飛行生命好短, 35歲便要退下來,畢業回港做了 8年空姐,雖未屆退休,但也想多留在家人身邊。親戚介紹之下便轉了行。」最初 Sendy只需面對客人,落手落腳的師傅都「蝦」她,覺得她乜都唔識。愛挑戰不服輸的她遂鼓起勇氣學做。慢慢做出口碑,客人都對她的細心另眼相看。不過最後因與老闆意見不合辭職。「老闆入好平的原料,只求量不重質。我卻要慢工細貨做到零瑕疵!」
辭職後 Sendy轉行做貿易,公司賣環保產品。但不住有舊客「刮」她,希望她重出江湖。「冇諗過返轉頭,但當時老闆唔出糧,心想不如自己創業。搵了一位舊客,亦是朋友,幫忙出錢開舖。」那是 2008年金融海嘯前夕。開舖 3日,海嘯來臨,奇蹟出現,舊客知道她出山,紛紛排隊來「碌卡」,「好多舊客來買 package支持,但我其實無做 package,逐次收費清清楚楚更好。」


當空姐時攝。 

伙記眼中, Sendy是老闆、是師傅,更像阿媽!「因為我會經常『哦』佢哋,他們耐不住我煩,便會乖乖做好工作。」 Sendy的家長式溝通方法看來幾見效。 

當架車係自己塊面

估唔到做汽車美容都有粉絲,情況就好似跟住信任的美容師、髮型師過檔一樣。服務行業最緊要俘獲客人的心。「將客人的車當成自己的車其實未夠,當成自己塊面去料理就差唔多。」 Sendy在伙記,甚至客人眼中,都被認為患潔癖和強迫症!超細微、毫不顯眼的塵垢她都無法容忍,唔抹唔舒服。例如車廂冷氣出風位罩住抹唔到,她會諗計吸出來甚至拆下來抹;車頂架下面有窿罅抹唔到,索性拆下來抹完裝番。洗車啫,認真程度客人看見都「 O」嘴!「來得幫襯,我都希望他們是有要求而來。」
相信客人就是買這份細心和欣賞服務的一絲不苟,不然不會隨隨便便將數百萬元的超級跑車、過千萬元的豪華房車拿來讓 Sendy清潔。不過呢行不是單靠一人之力可成功,一班伙記是否一條心非常重要。「我用家長式的方法與員工溝通,我指的是外國家長,我從來不鬧伙記,反而會不斷讚,在客人面前讚,給予一種肯定。伙記學歷都唔高,後生仔一定有諗唔開的時候,鬧下情緒玩劈炮,或者偷下懶咁,我就好似阿媽咁循循善誘,俾空間佢哋學習和進步。」 Sendy「紅褲仔」出身,伙記都是她親手教出來,現在雖然是老闆,但也會做埋一份,幫伙記執手尾、教授新技術,絕非單單指指點點。老闆一股認真和幹勁,相信亦是讓伙記心悅誠服的原因。
待伙記如家人,待客人如知己,抱持真誠,賣服務的行業,能實實在在做到這兩點,成功不會遠。


外表出位的各式架生,唔係玩 gimmick,這支「大炮」其實是「真空吸索器」,蒸完內櫳後,負責將多餘水分抽出,避免濕氣殘留。 

Sendy引入了美國軍用的殺菌科技,釋出的活性氧可分解潛藏在整個冷氣系統和車廂的細菌。當年南亞海嘯災區消毒工作亦是用相同技術。 

 

開業成本
裝修: 100萬
器材: 30萬 
入貨連舖租按金、上期: 70萬

每月收支
租金連人工: 10萬 
入貨: 6萬

每月盈利: 4萬(開業 5年投資剛開始回本)

 


Sendy經手扮靚的名貴靚車多不勝數。 

Sendy的服務比坊間一般汽車美容店貴,但用料和技術頂尖。例如打蠟會用飛機用的納米聚合技術,玻璃跣水膜也是德國引入、用於船隻的納米科技。滿足有要求、精益求精的人。(航空用漆面護理$4,300-$5,000、納米玻璃保護膜$900、車廂滅菌起漬$1,600-$1,800、洗車吸塵$250-$280 http://carslandhk.com 

 

創業獎評判:難開分店
Sendy憑一份執着,去年更獲得香港青年協會主辦的「滙豐青年創業大獎」
優異獎及網上最具人氣獎。評判的綜合評價是:「汽車美容一向是男士天下, Sendy將她以往做空姐的經驗,應用在汽車美容業上,同樣得心應手。
評判對她的服務態度給予良好的評價,並且欣賞她積極蒐羅及售賣各種汽車環保產品,落實執行企業的社會責任。
當然,這類服務業也有一定的限制, Sendy重個人的貼心服務,因而未必有足夠的人手和時間開設更多分店。」


撰文:黃文英
攝影:劉玉梅 

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()