梁慧恩( Viann)學整的貓山皇班戟是鋪頭 signature,「個皮係脆㗎。」 

名人投資 梁慧恩( Viann)

工廈大王孫新抱 元朗賣甜品

去年下嫁「工廈大王」楊耀松外孫林忠澤的多媒體主持人梁慧恩,婚後未有繑埋手做少奶奶,反而和五個朋友集資近千萬,在元朗開了間專做貓山皇甜品的店子。貓山皇是榴槤中的極品,吃後有股回香,賭王何鴻燊也曾派專機把貓山皇由檳城空運去澳門。貓山動輒七百至千元一個,如今梁慧恩把果肉做甜品,數十元有得吃,她說:「我哋覺得係一個商機,想做到平民化。」

元朗試水溫

籌備了五個月的甜品鋪叫「貓山皇」,選在元朗仁樂坊開鋪,梁慧恩( Viann)說;「睇過大坑、天后和尖沙咀,但鋪租貴,一百萬鋪租要賣幾多班戟才維皮?」最後他們殺入元朗,貪鋪租平可試水溫,「因為同新加坡 partner簽咗連鎖式合約,範圍 cover廣東省、香港和澳門,所以第一間會小心啲,唔可以有差池,元朗人口也有幾十萬足夠支持一間鋪頭嘅運作,夜市又好旺,屯門過嚟又近,如果好食,啲人就會嚟買。」但 Viann老公是滙能集團能源管理公司執行董事,話晒生意人, Viann當然要請教老公,「佢教我數口點樣可以計得精啲,又幫鋪頭做能源管理,開鋪之餘也要環保。」至於鋪頭設計,便找來幫地產發展商做高級畫則師的林忠豪弟弟林忠杰義務幫手,「純粹拍膊頭發揮吓創意無收錢。」


梁慧恩( Viann)說在老公求婚時,才知其家族背景。 

梁慧恩( Viann)和大股東 Victor一齊試食自家出品。 

特色裝修

設計由門口到廚房及洗手間,也由三個貨櫃組合成,「我哋真係去了元朗買貨櫃,切割及重新裝嵌。」用這種 shipping container設計,原來另有目的,「這設計在紐約很流行,想做到好似貓山皇啱啱運到,喺貨櫃拎出嚟。因為貓山皇從樹上跌落嚟就要即刻處理和急凍,物流過程要快,否則變味。」大部分員工亦在馬拉或從新加坡請過來。在老公公司身兼社企責任及可持續總監的她,在甜品鋪亦大倡環保概念。「貨櫃是廢物利用,燈用節能燈,所有包裝用 recycle嘅紙,膠嘅容器亦用 biodegrable,仲預留資金開分店,要集資八位數字就係咁解。」餐廳有十多款貓山皇甜品,售價由十多至五十多元不等,但不食貓山皇的客人,亦有芒果班戟和芒果糯米糍可供選擇。
由五月至八月, Viann和丈夫不停試味,她也肥了五磅,「我哋亦去勻全港九有啲名嘅糖水鋪,試人哋嘅榴槤甜品,大概想知係咩水平及香港人嘅口味,真是食到驚。」貓山皇甜品店本週六開張,如果生意好,還會開分店。「未諗到目標開幾多間,其實又唔開得太多,因為貓山皇供應有限,唔會開到似便利店總有一間在左近,物以罕為貴。」


在中大讀海洋保育博士生的她,要兼顧生意,那生 B大計呢?「今年唔生就要等四、五年畢業後才可以生,因為中途懷孕,我唔可以潛水攞數據。」 

榴槤極品貓山皇 

「花樣年華」特飲由浸泡過話梅的番茄和話梅冰泡製,可解榴槤燥熱及辟味。

貓山皇布丁雞蛋是鎮店甜品之一。 

店內可為顧客特別訂製貓山皇餡料的蛋糕。 

店鋪內有不少心思設計,如「熊出沒注意」變「榴槤」(下圖),環保外賣盒亦由她設計。


鋪頭可坐廿多人,除堂食外,亦另設外賣。 

撰文:李苑欣
攝影:葉志明

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()