以為好多人留言討論?實情可能係同一個網絡打手玩分身。 

CLOSE-UP

網絡五毛黨

係人都怕蝕底, shopping旅行結婚生仔,全部都要睇咗其他人經驗先,甚至上網查埋心水店鋪「家宅」,做足功課以免做羊牯。
不過網上世界真假難分,無論睇討論區抑或個人 blog,評語一味唱好,實情隨時出自網上五毛黨(又稱網絡打手)嘅「真心 post」。好似月初就有黑客截取到台灣三星代理同討論區網絡打手嘅電郵,揭發討論區入面嘅「討論」、「分享」,查實全部自編自導。
網絡打手咁識做戲,點先分到?即刻教你。

1.性格分裂

招數:一個人用幾個身份出 post,係人都識。不過, Zoe話專業打手會認真為每個賬戶設定好唔同人物性格同語氣,例如 A賬戶語氣寸嘴, B賬戶口水多過茶……寫出嚟嘅 post就自然個個唔同,冇咁易俾其他網民揭穿玩分身。
拆招:因為使用嘅語氣唔同,極難睇得出係咪出自同一人手筆,唯有由錯別字入手,好似經常會打錯嘅廣東字「啦」(拉)、「呀」(牙)、「唔」(吾),如果發現幾個賬戶同時打錯同一堆字,造馬指數就極高。
難拆指數:★★★★( 5★最難拆)

2.引擎造馬

招數:用 Google之類嘅搜尋引擎搵網站,以為出嚟嘅結果排名最公平公正?其實搜尋引擎嘅排名結果,係根據關鍵字嘅活躍程度釐定,打手就利用呢個方法,不停喺討論區、 blog裡面輸入負責品牌嘅關鍵字,令搜尋引擎以為相關字眼好火熱,顯示搜尋結果時,就會推高品牌嘅排名。
拆招: Maurice爆料話控制排名結果,通常只會做到頭三版,所以只要睇多幾版搜尋結果,如發現已經冇咗相關品牌或產品名稱,就可以知道唔係真係咁多人搵。
難拆指數:★★★

3.開箱陷阱

招數:捉正網民「買玩具」心理,最開心莫過於拆盒一刻,所以網上(尤其數碼產品)經常有「開箱文」,即係物主影低成個開盒過程,睇到準買家流晒口水。其實 Maurice話當中唔少開箱文都係品牌交俾打手去做,旨在增加新機曝光率。
拆招:開箱文誤導指數唔算太嚴重,只要識得過濾當中過分吹捧嘅說話就得,切忌盡信,可以大大減低中伏指數。
難拆指數:★

4.夾時間留言

招數:有睇討論區都知,版面會顯示出 post時間,所以打手會設定好回覆時間,唔會出完產品留言,即刻「自我」回覆讚好。成功嘅網絡打手會夾人夾時間,例如我開完產品 post,另一個人隔幾多分鐘至回覆,覆完之後又要隔一段時間至答,全部計過度過,先容易令網民信以為真。
拆招:如果係大型討論區,都可以用網頁內嘅搜尋功能,翻查唔同賬戶出過咩 post,發現每次呢個賬戶開 post,第一時間回覆嘅人都熟口熟面,就有可能係同一班網絡打手做嘅,咁就要小心。
難拆指數:★★★★★


出 post五分鐘就有人覆,仲要嚟嚟去去都係嗰幾個人講,打手味甚濃。 

為求增加吸睛度,台灣的開箱文更加用上美色做招徠。 

5.人多好辦事


見到網上請打手,好多時都以為自己做自己嘢,但其實之後判頭會夾埋幾個人一齊做,增加可信性。 

招數:部分網民識得查出 post人嘅 IP網絡位址,打手為免俾人發現幾個賬戶都用同一個 IP出 post,通常會搵多四至六個打手,交換對方嘅 IP用,有時連 Zoe都好難睇得出。
拆招:可以用軟件《 NeoTrace Pro》連結返去討論區睇賬戶 IP,之後對比一下幾個懷疑係打手嘅賬戶有冇試過用同一組 IP,如講嘅產品又一模一樣,就可以斷定係同一班打手所為!
難拆指數:★★★

揪出網絡打手

網絡打手無處不在,究竟點先分到誰是打手?一於搵嚟兩位業內人士,同你拆解打手常用招數,等你做個精明網民。

Maurice Hon
網絡打手判頭
搞網絡營銷十五年,三年前開始做埋網絡打手判頭,經常喺網上討論區發掘「人才」。

 

Zoe
城市大學電子商貿三年級學生
七年前開設網上商店 Kami beauty hair shop賣駁髮片,唔單只自己做過網絡打手,身邊好多同學都兼職做緊,熟悉業界行情。

打手流程

今時今日,網絡打手已經係公開嘅秘密,打手公司甚至會公然喺招聘網站請人,為咗更了解工作流程,我哋特登去打手公司見工,了解一下要做啲乜同埋收入如何。


第一步喺見工網站 send電郵去網絡打手公司,應徵做網絡打手。 

第二步收到打手公司電話,對方會叫你提供討論區賬戶名稱、去開邊啲討論區或有冇個人 blog,睇吓你係咪活躍用家。 

第三步成功的話,除咗用自己 account出 post,打手公司仲會提供一堆 IP,等你可以轉換身份出 post。公司會根據你嘅賬戶名稱,翻查所出嘅 post有冇其他網民回覆,每個回覆約可收五至十蚊。

宣傳高招


而家好多網友拍搞笑片抽水,拍片時會好似電視台咁,有唔同類型嘅產品入鏡。 

上網搞宣傳,未必一定靠打手,有時仲要食腦度橋,而家好多廣告公司直情開多條 team,搵專人負責搞網絡推廣, Jansen就係其中一分子,等佢 share一下平時用乜方法谷網絡人氣。

抽水軟銷
打手冇名冇姓,未必吸引到人注意,網絡好多紅人,出個 post已經幾千人 share,搵佢哋幫手,宣傳效果自然大好多。不過 Jansen話佢哋通常唔肯 hardsell,「始終驚破壞形象趕客,要諗方法軟銷,舉個例子,好似前排財爺話飲咖啡先算中產,可以搵專抽水講政治時事嘅網絡紅人講呢單嘢,但就乘機放咖啡產品相喺個 post入面,網友 share篇文等於幫手賣廣告,好過搵人喺 forum係咁讚隻咖啡有幾好飲。」

真心用家
除咗紅人,仲要𥄫實多 fans嘅 bloggers,「留意每個 blogger嘅喜好,平日鍾意用乜機同埋最熟邊瓣,例如某 blogger鍾情韓國嘢,如果咁啱要幫 Samsung搵打手,就會第一時間送部新機俾嗰位 blogger試機,付出少少就換嚟高回報,而且話晒個 blogger係真心 Like,篇文鱔味比較低,提高可信度。」

着數吸引
另外,要搏網友狂 share,冇着數唔使諗,送戲飛送 Starbucks禮券就最簡單,或者好似 JAG呢類廣告網站,要 share夠指定廣告數量先可以換嘢。 Jansen話如果有橋,甚至連禮物都唔使,「試過幫 Nikon搞 Facebook game做宣傳,叫網友提交攝影作品,最多 Like嘅可以出現喺網站廣告裡面,冇實質嘢送,但自己影嘅相俾 Nikon認同喎,幾有成功感,就係咁呃到好多 Like。」

 

 


JAG規定會員要喺 facebook度 share廣告,到一定數目先有獎品換,用呢招成功儲到接近十四萬會員。 

投稿作品要多 Like先會勝出,作者落力搵朋友俾 Like,變相提升人流。 

 

呂贊柱 Jansen
4A廣告公司 WPP旗下子公司 AGENDA副總監
近三、四年專門為各大品牌喺網絡做宣傳,每日工作離唔開幫品牌度橋呃 Like,招數層出不窮。

反打手心得

網絡發達有利資訊交換,但同時亦更易俾人利用嚟宣傳呃人。由於打手無處不在,網上留言又疑幻似真,如果跟住推介去購物,好易中招。落區做街訪,發現竟然有九成人都話領教過打手陷阱,交過學費,都有啲心得防打手。

當作參考
Kylie
28歲
兼職模特兒
「唔會信網上評論,最多睇嚟做參考,好似揀食肆,首先搵咗目標,再睇網友上傳嘅食物相吸唔吸引,過咗兩關先睇食評,咁就唔怕俾留言左右。」話雖如此,但 Kylie話都試過睇完食評,見網友勁彈間鋪,結果打消幫襯念頭,隨時中咗招都未定。

 

睇負評搵真心
Toby
19歲
理大工商管理系一年級
「不嬲都唔多信食評,但有次睇 OpenRice見有幾個網友猛讚間食肆服務質素,咪帶班朋友去試囉,點知完全貨不對辦,喺班 friend面前𤓓爆。」經一事長一智, Toby話以後會睇埋負面食評先幫襯,「睇落先發現,負評先係真心話,啲正評太似廣告喇。」呢招聽落幾 work,但弊在魔高一丈,有人出錢唱衰同行,呢招又點拆先?

 

長期觀察
Swing
22歲
大學生
要分清楚網友係咪打手, Swing提供一個獨門秘方,「睇開美容 blog,發現真正 blogger好少重複咁推介某牌子,收咗錢就例外。好似某啲藝人咁,月頭先講過某牌子嘅美白產品,月中又講番同牌子產品,咁 hardsell實係打手啦。」

 

唔使人認同
Hei
25歲
大學生
「雖然冇聽過有人做網絡打手,但間唔中去討論區,大部分留言都假到爆,完全冇參考價值。可能個人習慣唔同,買嘢要啱眼緣,唔會俾網友講幾句就買。」

 

屢試屢敗
Sherin
19歲
理大傳理系一年級
「 OpenRice多打手係人都知,但估唔到連表面中肯嘅美容 blogger,近年都一擔擔,試過好幾次跟 blogger推介買護膚品,試完先發覺冇乜用,最慘有次仲要皮膚敏感,好彩冇爛臉咋。而家會睇埋外國 blogger嘅評論,多個參考。」話你知,外國打手 blogger仲多,小心呀!

名人暗事

早前台灣 Samsung被黑客截取公司 email,揭發請打手事件,𤓓爆。其實請打手又豈止一家?

 


I.T.集團主席沈嘉偉(資料圖片) 

I.T.請打手
2011年喺大學招聘網( http://jijis.org.hk )上公然招聘網絡打手廣告,雖然廣告內冇提及係邊間公司請打手,但根據應徵 email地址追查,發現僱主竟然係時裝品牌 I.T.嘅附屬公司 I.T. apparels limited,令網民懷疑 I.T.都請過唔少打手,喺網上討論區內為旗下嘅時裝品牌護航。

 

三星戰台灣
四月初,台灣黑客截到 Samsung同台灣公關「鵬泰顧問公司」嘅內部文件,內容關於上年 GALAXY S3嘅行銷計劃,當中詳細提及點樣借助台灣著名 blogger以及網絡打手喺討論區軟銷新機及攻擊其他手機品牌。事件愈炒愈大,最後 Samsung只好喺 Facebook專頁承認此事,但就將所有責任推卸落員工身上……咁似香港高官嘅「語言偽術」?

 


Facebook創辦人 Mark Zuckerberg 

Facebook打 Google
兩年前,美國公關公司 Burson-Marsteller向傳媒發送有關 Google嘅負面新聞,當中包括 Google涉嫌侵犯用戶隱私等。網絡知名 blogger Chris Soghoian收到後將封 email公諸於世,雖然入面冇講係邊間公司搵 Burson-Marsteller去做呢件事,但經美國傳媒追查,發現原來係 Facebook背後搞鬼,惡意攻擊 Google。

 

OpenRice假食評
好多人搵食之前一定會上 OpenRice睇食評,有食肆睇到呢個「商機」,就私底下 email聯絡 OpenRice活躍用家,以每篇二十蚊至六十蚊嘅價格寫食評,搞到食評都開始信唔過。

 

只要在 Facebook以「 NEXT 3.0」為關鍵詞搜尋,或以手機的「 QR code」 app掃描,就可以睇到更多新聞同產品情報。


text:科技組
photo:攝影組

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()